Քանդակագործ Տիգրան Արզումանյանը խորապես հիասթափված է, քանի որ 2018-ին, իր բնորոշմամբ, մեծ խանդավառությամբ ընտրված այս իշխանությունը չարդարացրեց հասարակության մեծամասնության հույսերը, ավելին, պատերազմում պարտություն կրեցինք:
«Տեսակետ» մամուլի ակումբում հրավիրված մամուլի ասուլիսի ընթացքում նա անդրադարձավ նաև ընդդիմադիր ուժերին ու նշեց. «Մյուս կողմից էլ, որ նայում եմ այս ընդդիմադիր կուսակցություններին, որոնց հիմքում կանգնած են նախկինները, որոնք պետք է պատիժ կրեին և խուսափում են, նրանք էլ հիմա նորից իշխանության են ուզում գալ: Այդ հիասթափությունը ես կիսում եմ ոչ միայն իմ ընկերների, այլև ժողովրդի հիսուն, վաթսուն տոկոսի հետ»:
Ըստ քանդակագործի՝ առաջիկայում անցկացվելիք ընտրությունները խայտառակ ընտրություններ են լինելու, և ինքն էլ՝ որպես ՀՀ քաղաքացի, չի մասնակցելու դրանց:
Ճգնաժամային այս իրավիճակից ելքի ճանապարհ նա համարում է այն, որ հայտնի մի ուժ, մի անձ, որին ժողովուրդը կվստահի ու կհավատա, կգա իշխանության. «Մեզ հիմա լեգիտիմ իշխանություն է պետք միջազգային այս քաղաքական խժդժությունների մեջ: Մինչդեռ հիմա կոպիտ աքլորակռիվ է, որին մասնակցում են այդ բոլոր թվացյալ 17 կուսակցությունները, որոնք դատարկություն են: Հիմնական պայքարը մղվում է հանրապետականների և Ռոբերտ Քոչարյանի կողմից: Դաշնակցությունը Հայաստանում ինձ թվում է սպառված կուսակցություն է, որը մեկ տոկոս էլ չհավաքեց ընտրություններում»:
Կարդացեք նաև
Ադրբեջանի կողմից հայկական մշակութային ժառանգության ոչնչացման առիթով քանդակագործը հիշեց, որ վերջին օրերին Հայաստանում բրոնզե արձանիկներ են գողանում, ինչը նշանակում է, որ մենք մեր ներսում անգամ մեր արժեքները չենք պահպանում: Նա մտահոգված է՝ այս տարիներին ի՞նչ ենք արել. «Բավականին խաղաղ տարիներ եղան, ի՞նչ արեցինք, մենք միջազգային կազմակերպություններին ինչպե՞ս դիմեցինք, եղավ Ջուղայի խաչքարերի ոճրագործություն, ի՞նչ արեցինք: Մենք միշտ մեղադրում ենք, սպասում միջազգային կազմակերպություններից, բայց չենք դիմում, առանձնապես այդ ճանապարհով աշխատանք չենք տանում: Նույնն էլ այսօր է»:
Քանդակագործը նաև ցավում է, որ վերջին երեսուն տարիների ընթացքում տաղանդավոր մարդիկ քիչ են ծնվել: Հիշելով խորհրդային միության ժամանակահատվածը՝ նա զուգահեռներ անցկացրեց. «Խորհրդային միության ժամանակ այդ երկրում, որտեղ շատ դժվար էր ազգային բաներ անելը, ունեցանք ազգային տաղանդավոր մարդիկ, որոնք ծնվեցին, մեծացան և աշխատեցին: Այս երեսուն տարվա մեջ ի՞նչ ազգային ծրագիր ենք իրագործել, դժվարությամբ եմ կարողանում հիշել: Բացի քանդելուց, որ ազգայինը պետք չէ առաջնակարգ համարել, մշակույթի նախարարությունը վերացնելուց, փաստորեն, ոչինչ չարեցինք»:
Տաթև ՀԱՐՈՒԹՅՈՒՆՅԱՆ
