Գեղասահքի Հայաստանի հավաքականի անդամ Թինա Կարապետյանը հայտնել է, որ իրենցից խլել են օլիմպիական երազանքը և թույլ չեն տվել մասնակցել աշխարհի գեղասահքի առաջնությանը և նվաճել Օլիմպիական խաղերին մասնակցելու իրավունքը:
Հրապարակած տեսանյութում Թինան պատմում է, որ իրենք մշտապես COVID-ի թեստ են հանձնել, որը բացասական է եղել:
Նրա պարային զույգը՝ Սիմոն Սենեկալն էլ հավելել է, որ վերջին պահին իր թեստի պատասխանը դրական է եղել, չնայած որ ինքը մշտապես պահպանել է համաճարակային անվտանգության կանոնները: Նա ստիպված նոր թեստ է հանձնել, և կազմակերպիչները խոստացել են, որ թեստի պատասխանը կլինի մինչև իրենց մրցման մեկնարկը: Այնուամենայնիվ, թեստի պատասխանը ուշացել է, և զույգը բաց է թողել իր մրցումը: Դրանից հետո Սենեկալի թեստի պատասխանը կրկին դրական է եղել, Թինայինը՝ բացասական:
«Ամենացավալին այն է, որ երբ մեր պատվիրակությունը գրավոր պահանջեց սառույց դուրս գալուց առաջ հանձնած առաջին թեստերի պատասխանները, պարզվեց որ իմ ու Թինա Կարապետյանի պատասխանները բացասական են եղել, դրական մեզ սխալմամբ են ասել»,- պատմել է Սենեկալը:
Կարդացեք նաև
Հայաստանի գեղասահքի ֆեդերացիան դիմել է միջազգային ֆեդերացիային զույգի վերաբերյալ որոշում կայացնելու խնդրանքով:
Պատրաստեց Վիկտորյա ԱՆԴՐԵԱՍՅԱՆԸ
