Մարզաշխարհի ներկայացուցիչների համար հրավիրված խորհրդակցությունում Հայաստանի ազգային օլիմպիական կոմիտեի գլխավոր քարտուղար Հրաչյա Ռոստոմյանը ներկայացրել է այն փոփոխությունները, որոնք տեղի են ունեցել Տոկիոյում ամռանը կայանալիք ամառային օլիմպիական խաղերի կազմակերպման ոլորտում:
Մասնավորապես, նա նշել է, որ պարտադիր պայման է պատվիրակությունների անդամների, բացառությամբ՝ մարզիկների, պատվաստված լինելը եւ անձնագիր ունենալը: Ընդ որում, ընդունելի են բոլոր այն պատվաստամիջոցները, որոնք ճանաչել է ԱՀԿ-ն:
Օլիմպիկանները մրցավայր ժամանել կարող են ոչ շուտ, քան իրենց մասնակցությունից հինգ օր առաջ եւ առավելագույնը 48 ժամվա ընթացքում պետք է լքեն երկիրը մրցելույթներն ավարտելուց հետո:
Հրաչյա Ռոստոմյանը նաեւ տեղեկացրել է, որ Ճապոնիայում ուսումնամարզական պարապմունքներ չեն կազմակերպվելու:
Կարդացեք նաև
Խիստ կրճատվել է մարզական պատվիրակությունների ղեկավարների, ուղեկցողների եւ մարզիչների քանակը: Մասնավորապես, յուրաքանչյուր մարզաձեւում ամեն չորս մարզիկի պարագայում թույլատրվում է ունենալ մեկ մարզիչ:
ՀԱՕԿ գլխավոր քարտուղարի փոխանցմամբ, մեր ընդհանուր պատվիրակությանը հատկացվել է մեկ բժշկի տեղ:
Աշոտ ՀԱԿՈԲՅԱՆ
