ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա) և Էնդրյու Շոֆերը (ԱՄՆ) կոչ են արել ազատ արձակել բոլոր ռազմագերիներին և այլ պահվող անձանց՝ անկախ կալանավորման հիմքերից: Այս մասին ասվում է համանախագահների տարածած համատեղ հայտարարության մեջ:
Համանախագահները մայիսի 27-ին և 28-ին խորհրդակցություններ են անցկացրել Կարմիր խաչի միջազգային կոմիտեի նախագահ Փիթեր Մաուրերի և ՄԱԿ-ի փախստականների հարցերով գերագույն հանձնակատար Ֆիլիպո Գրանդիի հետ: Հանդիպումներին մասնակցել է նաև ԵԱՀԿ գործող նախագահի անձնական ներկայացուցիչ Անջեյ Կասպրշիկը:
«Համանախագահներն ի գիտություն են ընդունել մայիսի 27-ին վեց հայ զինծառայողների ձերբակալման փաստը և կոչ են արել ազատ արձակել բոլոր ռազմագերիներին և բոլոր այլ հիմքերով կալանավորված անձանց: Համանախագահներն ընդգծել են կալանավորված անձանց հետ միջազգային մարդասիրական օրենսդրությանը համապատասխան վարվելու պարտավորությունը: Համանախագահները վճռականորեն կոչ են արել կողմերին անհապաղ վերացնել Լեռնային Ղարաբաղ մարդասիրական մուտքի բոլոր սահմանափակումները, և կողմերին կոչ են արել ամբողջությամբ իրականացնել նոյեմբերի 9-ի հրադադարի հայտարարությամբ ստանձնած պարտավորությունները»,- ասվում է հայտարարության մեջ:
Համանախագահները նաև մտահոգություն են հայտնել հայ-ադրբեջանական չգծանշված սահմանին տեղի ունեցած միջադեպերի առումով: «Սահմանային վեճերը լուծելու համար ուժի կամ սպառնալիքի գործադրումն անընդունելի է: Մենք կողմերին կոչ ենք անում անհապաղ քայլեր ձեռնարկել, ներառյալ զորքերի վերադասավորումը, իրավիճակը լիցքաթափելու և սահմանի խաղաղ սահմանազատման ու սահմանագծման նպատակով խաղաղ բանակցություններ սկսելու համար: Համանախագահները պատրաստ են օժանդակել այդ գործընթացին»,- ասվում է հայտարարության մեջ:
Կարդացեք նաև
Հաշվի առնելով ԵԱՀԿ իրենց մանդատի պայմանները և տարածաշրջանի ժողովուրդների՝ դեպի կայուն, խաղաղ և բարեկեցիկ ապագա ունեցած ձգտումները՝ համանախագահները կրկին կոչ են արել կողմերին հնարավորինս շուտ վերադառնալ իրենց հովանու ներքո:
Պատրաստեց՝ Վիկտորյա ԱՆԴՐԵԱՍՅԱՆԸ
