ՀՀ ԱԺ արտահերթ ընտրությունների 5-րդ համար «Ազատություն» կուսակցության նախագահ,ՀՀ նախկին վարչապետ Հրանտ Բագրատյանը քարոզարշավի պաշտոնական մեկնարկի առաջին օրը շատ խիստ արտահայտվեց գործող իշխանության հասցեին:
«Ինչպե՞ս ասեմ, որ համեստ լինի: Ստացվել է այնպես, ասես, մարգարե դարձած լինեմ: Երկու օր առաջ խոսում էինք՝ երեկ ադրբեջանցիները Վարդենիսի հատվածում խորացան եւս 11 կիլոմետր: Տեղ կա, որ ադրբեջանական սահմանից մինչեւ մեր մոտ 18 կմ են խորացած: Մի 18 կմ էլ գան, Սեւանն է: Եթե հունիսի 20-ին Նիկոլ Փաշինյանը վերընտրվի, ինքը բոլորիդ ցույց կտա այն փաստաթղթերը, որոնց մասին ԱԺ-ում ասում էր՝ ստորագրելու եմ:
Բարեբախտաբար, մեր ժողովրդի մի ստվար հատվածը խելացի է: Հիմա եկեք հասկանանք: Նոյեմբերի 9-ի հայտարարությունը սխալ հայտարարություն է: Այնտեղ Հայաստանի սահմաններն են զիջված: Բացի դա, Արցախի անունից է կնքված: Բայց խնդիրն այն է, որ այդ սխալ հայտարարությունը արդեն ի կատար է ածված: Մենք երբեք չենք ընդունելու նոյեմբերի 9-ի հայտարարությունը: Այն օրենքով պետք է համաժողովրդական հանրաքվեի դրվեր, ինչը չարեց հանրապետության նախագահը: Սա էլ խոսելու մեկ այլ թեմա է: Մենք հունիսի 20-ին Նիկոլին հեռացնելով՝ անմիջապես հեռացնելու ենք նաեւ Արմեն Սարգսյանին:
Հասկացեք, Հայաստանը բաստուրմայի պես շերտ-շերտ կտրտում են: Ադրբեջանի նպատակը Հայաստանից 2,5 հասար քառակուսի կիլոմետր պոկելն է: Նա պատահաբար չի մտել Գեղարքունիք՝ Վարդենիս, Շորժա, Կութ եւ Սիսիանի հատված: Ժողովուրդ, լսեք: Նույնիսկ նրանք, ում Նիկոլը հիմարացրել է: Այդ բոլորը համաձայնեցված է: Հիշեք: Էլի ես ճիշտ եմ դուրս գալու: Հիշեք: Մեկ տարի ինձ ասում եք բայղուշ: Թող ես բայղուշ համարվեմ: Բայց ինչ ասում եմ, ճիշտ է դուրս գալիս: Ու ես սա պարզապես գիտեմ:
Կարդացեք նաև
Նիկոլը մեր սահմանապահներին արգելում է կրակել, երբ նրանք գալիս են: Այսօր մեր սահմանապահը չգիտի, թե որն է սահմանը: Որովհետեւ իր երկրի ղեկավարը իրեն չի ասել, որ հող է տվել: Ադրբեջանցին գալիս, ասում է՝ ինչո՞ւ ես մեր հողի մեջ, թղթերը ստորագրած՝ ձեռքներս է: Ու երբեմն՝ կրակում է, երբեմն՝ գերեվարում է, երբեմն էլ բավարարվում է ականջ քաշելով:
Եվ ուզում եք այսպես ապրե՞լ: Չեմ պատկերացնում որեւէ մեկին, որ կգնա ու Նիկոլին քվե կտա»,- ասաց Հրանտ Բագրատյանը:
Աշոտ ՀԱԿՈԲՅԱՆ
