«Քաղաքացիական պայմանագիր» կուսակցության հրավիրած հետընտրական հանրահավաքը Հանրապետության հրապարակում մեկնարկեց Հայաստանի հիմնով եւ մեկ րոպե լռությամբ 44-օրյա պատերազմում զոհվածների հիշատակը հարգելով: Նիկոլ Փաշինյանն իր ընտանիքի եւ թիմակիցների ուղեկցությամբ հանրահավաքի եկավ կառավարության շենքից`«Նիկոլ վարչապետ», «Նիկոլ, Նիկոլ» վանկարկումների, ուռաների, ծափերի եւ սուլոցների ներքո:
Հանրահավաքը բացեց Սուրեն Պապիկյանը`ողջունելով «ՀՀ իրավատեր ու հպարտ քաղաքացիներ» քաղաքացիներին ու մեջբերեց Նիկոլ Փաշինյանին` ասելով «սիրում եմ բոլորիդ»: «Երեկ ՀՀ քաղաքացին կատարեց պատմական առաքելություն: Երեկ մենք վերահաստատեցինք, որ իշխանությունը Հայաստանում պատկանում է ժողովրդին, որ ժողովուրդն է որոշում ու տնօրինում իր ու երկրի ճակատագիրը: Հայաստանում այլեւս փակված է արատավոր երեւույթների`ժողովրդին ստրկացնելու, վախեցնելու, կաշառելու մեթոդով վերարտադրվելու գործընթացը: Երեկ մենք միասին վերահաստատեցինք 2018 թվականի հեղափոխությամբ բերված արժեքները: Երեկ մենք ցույց տվեցինք, որ չնայած մեր ունեցած խնդիրներին, մեր վերքերին, մենք ամուր ենք կանգնած մեր ոտքերի վրա եւ պատրաստ ենք շտկել մեր ողնաշարը ու սա ի լուր աշխարհի է, բոլոր կասկածողների, բոլոր նրանց, ովքեր այլ հույսեր էին փայփայում: Դուք երեկ բոլորի ծրագրերն ուղարկեցիք դեպի անցյալ, դեպի գրողի ծոցը եւ մենք միասին ազդարարեցինք, որ Հայաստանում ապագա կա»,- ասաց Սուրեն Պապիկյանը`հավելելով`«Նիկոլ վարչապետ»:
ՔՊ անդամ Նազելի Բաղդասարյանն էլ ասաց, որ քաղաքացին պետք է գիտակցի`սա քաղաքացիների հաղթանակն է, գիտակցի, որ ՀՀ-ում իշխանությունը պատկանում է քաղաքացիներին, իսկ իրենք ծառայել ու ծառայելու են ՀՀ-ին. «ՀՀ յուրաքանչյուր քաղաքացու քվեից բաղկացած է մեր հաղթանակը. այն ամուր է, այն կուռ է եւ այն արտացոլում է ՀՀ քաղաքացու ոգին եւ հաղթանակը: Սպառնալիքները, ահաբեկումները փոշիացված են մեր կամքի, մեր հաղթական ոգու շնորհիվ, որովհետեւ մենք միասնական ենք, հաղթական ենք եւ վերահաստատում ենք`Նիկոլ վարչապետ»:
Ըստ Նազելի Բաղդասարյանի, այս հաղթանակը վերահաստատում է, որ 2018-ի հեղափոխությունը բարձր արժեք էր եւ ՀՀ քաղաքացին հետամուտ է այդ արժեքներին. «ՀՀ քաղաքացու դեմ խաղ չկա»:
Կարդացեք նաև
Նազելի Բաղդասարյանը նաեւ ասաց. «Համերաշխության կոչ ենք անում ուժերին, մենք մեր երկրում թշնամիներ չունենք, լինենք միասնական, բայց միևնույն ժամանակ թույլ չտանք, որ որեւէ ուժ փորձի բռնանալ մեր կամքին ու ոգուն»: Ասաց`ծնկի է գալիս որդեկորույս ծնողների առաջ, ովքեր այս ծանր պահին կարողացան բարձր դասել Հայաստանը:
Նելլի ԳՐԻԳՈՐՅԱՆ
Լա՛վ, իսկ Արցախը ձեզ ի՞նչ էր արել … Պահպանեիք մեր Փառապանծ Հաղթանակը, մեր Հպարտությունը, արժանապատվությունը և անցկացնեիք արտահերթ ընտրություններ, հաղթեիք և ասեիք այս խոսքերը: Այդ ժամանակ ձեզ կհասկանայինք …