2022 թվականի հունվարի 1-ից առեւտրի կետերում արգելվելու է պոլիէթիլենային տոպրակների տրամադրումն ու վաճառքը: Բացառություն են կազմելու երկրորդային հումքից արտադրված տոպրակներն ու կշռափաթեթավորման համար նախատեսված պարկերը, որոնք բռնակներ չունեն եւ գնորդները չեն կարող դրանք ապրանք տեղափոխելու համար օգտագործել: Այսօր այս մասին «Արմենպրես»-ի մամուլի սրահում ասաց ՀՀ շրջակա միջավայրի նախարարության ռազմավարական քաղաքականության վարչության պետ Լուսինե Ավետիսյանը:
Լուսինե Ավետիսյան
Նրա խոսքով, կան տնտեսվարողներ, որոնք մինչեւ օրենքի ուժի մեջ մտնելն են հրաժարվել պոլիէթիլենային տոպրակներից: Լուսինե Ավետիսյանը վստահեցրեց, որ բոլոր սուպերմարքեթներում պոլիէթիլենային տոպրակների փոխարեն հասանելի կլինեն այլընտրանքային՝ կտորից կամ այլ նյութից տոպրակներ:
Ավետիս Վարոսյան
«Յունիթրեյդ ինտերնեյշնլ» ընկերության հիմնադիր եւ գործադիր տնօրեն, գործարար, տնտեսագետ Ավետիս Վարոսյանի խոսքով, Հայաստանում տարեկան օգտագործվում են 12 տոննա պոլիէթիլենային տոպրակներ:
«Պլաստիկի արտադրության եւ քայքայման ընթացքում էլ մեծ վնասներ է կրում բնությունը: Արտադրության ժամանակ սպառում են մեծ քանակությամբ բնական ռեսուրսներ, որոնք իրենց հերթին վնասում են շրջակա միջավայրը եւ դրա օգտագործումից հետո առաջնում են քայքայման խնդիրներ, որոնք առաջացնում են միկրոպլաստիկներ, որոնք ոչ պակաս վնասակար են բնության համար»:
Կարդացեք նաև
Նրա խոսքով, աշխարհում տարեկան սպառվում է 5 տրիլիոն պլաստիկ տոպրակ, որից 300 միլիոնը հայտնվում է հողում, 20 միլիոնը՝ օվկիանոսներում. «Ըստ ՄԱԿ-ի տվյալների, մինչեւ 2050 թվականը օվկիանոսներում եւ աշխարհի բոլոր ջրերում կլողա ավելի շատ պլաստիկ, քան՝ ձուկ: Սա իրականում աղետալի ցուցանիշներ են, եւ եթե աշխարհի կողմից չնախաձեռնվեն ռադիկալ քայլեր, մենք այս աղետին կհասնենք ավելի շուտ»:
Լուսինե ԲՈՒԴԱՂՅԱՆ
