Օլիմպավանում կայացած ՀԱՕԿ գլխավոր համաժողովում մարզաշխարհի ներկայացուցիչները առաջադրել էին միայն Գագիկ Ծառուկյանի թեկնածությունը եւ նրան միաձայն վերընտրեցին Հայաստանի ազգային օլիմպիական կոմիտեի նախագահի պաշտոնում:
Ընտրվեցին նաեւ նախագահի երկու տեղակալներ՝ Օգսեն Միրզոյանը եւ Արմեն Գրիգորյանը, գլխավոր քարտուղար՝ Հրաչյա Ռոստոմյանը, նաեւ 15 անձից բաղկացած գործադիր կոմիտե:
Ինքը՝ Գագիկ Ծառուկյանը, ասաց, որ սկզբնապես չի ցանկացել հերթական անգամ առաջադրվել, սակայն ի վերջո, տեղի է տվել մարզական ֆեդերացիաների, կազմակերպությունների եւ անհատների հորդորներին:
Կարդացեք նաև
Արդեն համաժողովի ավարտից հետո Գագիկ Ծառուկյանը լրատվամիջոցների համար բացեց փակագծերը, թե ինչու չէր ցանկանում առաջադրվել. «Երկու օլիմպիական խաղեր մեդալ չկար, բայց կար մեծ ցանկություն աշխարհին ներկայացնել մեր մարզիկներին, որ ճանաչում ու հաղթանակներ լինեն, որպեսզի ամբողջ աշխարհը օլիմպիական խաղերում, աշխարհի ու Եվրոպայի առաջնություններում ոտքի կանգնած լսի Հայաստանի օրհներգը, նայի վեր հառնող Եռագույնին: Ու ես դրան հասա, ապացուցեցի, որ անհնարին ոչինչ չկա, որ հնարավոր է զբաղվել, ձգտել, պայքարել եւ հասնել: Եվ տեսանք, որ տարին տարվա վրա մեդալները եղան ու շատացան. Սկզբից՝ օլիմպիական խաղերի բրոնզներ, այնուհետեւ նաեւ արծաթներ ու ոսկիներ… Ես իմ հիմնական աշխատանքը կատարել եմ, ցույց եմ տվել, որ երբ սիրում ես երկիրդ, սիրում ես սպորտը, անհնար ոչինչ չկա: Իմ նպատակը հիմնականում իրականացել է»,-ասաց նա:
Աշոտ ՀԱԿՈԲՅԱՆ