2021թ. սեպտեմբերի 18-ին, ժամը՝ 18:50-ին, Արարատի մարզի Մրգավան համայնքի բնակիչը հաղորդում է տվել այն մասին, որ նույն օրը՝ ժամը 17:25-ի սահմաններում, փախցրել են իրեն պատկանող «Մերսեդես» մակնիշի ավտոմեքենան:
Իրականացված օպերատիվ-հետախուզական միջոցառումների արդյունքում պարզվել են դեպքի մի շարք հանգամանքներ, այդ թվում՝ հանցագործություն կատարած երկու անձանց ինքնությունը, ովքեր բերման են ենթարկվել ՀՀ ոստիկանության բաժին:
Ձեռնարկված միջոցառումների արդյունքում փաստական տվյալներ են ձեռք բերվել վերջիններիս կողմից մեկ այլ հանցագործություն կատարելու վերաբերյալ:
Մասնավորապես՝ պարզվել է, որ 2021թ. օգոստոսի 31-ին, Երևան քաղաքի Արշակունյաց պողոտայում նույն անձինք փախցրել են ևս մեկ ավտոմեքենա:
Կարդացեք նաև
Դեպքերի առթիվ ՀՀ ոստիկանությունում հարուցվել են քրեական գործեր:
Որոշում է կայացվել՝ հիշյալ քրեական գործերը մեկ վարույթում միացնելու և նախաքննություն ՀՀ քննչական կոմիտեի Երևան քաղաքի քննչական վարչության Շենգավիթ վարչական շրջանի քննչական բաժնում համատեղ կատարելու մասին:
Ձեռք բերված բավարար ապացույցների համակցությամբ՝ հիշյալ անձանցից մեկին մեղադրանք է առաջադրվել՝ ՀՀ քրեական օրենսգրքի 176-րդ հոդվածի 3-րդ մասի 1-ին կետով և 177-րդ հոդվածի 3-րդ մասի 1-ին կետով, իսկ մյուսին՝ 176-րդ հոդվածի 3-րդ մասի 1-ին կետով: Նրանց նկատմամբ որպես խափանման միջոց ընտրվել է կալանավորումը:
Նախաքննությունը շարունակվում է:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
ՀՀ ՔՆՆՉԱԿԱՆ ԿՈՄԻՏԵԻ ՏԵՂԵԿԱՏՎՈՒԹՅԱՆ ԵՎ ՀԱՍԱՐԱԿԱՅՆՈՒԹՅԱՆ ՀԵՏ ԿԱՊԵՐԻ ԲԱԺԻՆ
