Պաշտոնական Բաքուն պատրաստ է գործակցել ՅՈՒՆԵՍԿՕ-ի հետ «Ադրբեջանի Ղարաբաղ շրջանում» հետպատերազմյան վերականգնման, ինչպես նաև տարածաշրջան կազմակերպության տեխնիկական այց կազմակերպելու ուղղությամբ: Այս մասին հայտարարել է Ադրբեջանի արտգործնախարար Ջեյհուն Բայրամովը:
«Ադրբեջանը պատրաստ է գործակցել ՅՈՒՆԵՍԿՕ-ի հետ հետպատերազմյան վերականգնման հարցում, և կողմերն ակտիվ երկխոսություն են վարում մեր ազատագրված տարածքներ տեխնիկական առաքելություն ուղարկելու ուղղությամբ»,- ասել է Բայրամովը Փարիզում ՅՈՒՆԵՍԿՕ-ի Գլխավոր համաժողովի 41-րդ նստաշրջանի քննարկումներում:
Նրա խոսքով՝ կողմերը համաձայնեցրել են մի շարք բարդ տեխնիկական, իրավական և քաղաքական հարցեր, որոնք կապահովեն առաքելության արդյունավետությունն ու անկախությունը:
Բայրամովը նաև բողոքել է, որ Հայաստանը «ադրբեջանական հողերի օկուպացման տարիներին ոչնչացրել է Ադրբեջանի պատմամշակութային ժառանգությունը, ինչպես նաև տասնամյակներ շարունակ բացահայտորեն խոչընդոտել է ՅՈՒՆԵՍԿՕ-ի առաքելության իրականացումն Ադրբեջան, ինչի մասին վկայում է կազմակերպության 2005թ. հաշվետվությունը»:
Կարդացեք նաև
Բացի այդ, Բայրամովը դժգոհել է, որ Հայաստանը «հրաժարում է տրամադրել ականապատ տարածքների քարտեզները և դիտավորյալ կերպով խոչընդոտում է փախստականների և հարկադիր տեղահանվածների վերադարձին ազատագրված տարածքներ»:
Պատրաստեց Վիկտորյա ԱՆԴՐԵԱՍՅԱՆԸ
