Քիչ առաջ ՀՀ բարձրագույն դատական խորհուրդը մերժեց արդարադատության նախարարության միջնորդությունը՝ Երևան քաղաքի ընդհանուր իրավասության դատարանի դատավոր Զարուհի Նախշքարյանին կարգապահական պատասխանատվության ենթարկելու վերաբերյալ:
Հիշեցնենք՝ մեկ այլ գործով ևս ԲԴԽ-ն մերժել էր նախարարության միջնորդությունը դատավորին կարգապահական պատասխանատվության ենթարկելու մասին, իսկ մեկ ուրիշով՝ բավարարել: ԲԴԽ-ն քննում էր Հանրային խորհրդի նախկին նախագահ Ստեփան Սաֆարյանի գործի հետ կապված Զարուհի Նախշքարյանին կարգապահական պատասխանատվության ենթարկելու գործը: Եթե Նախշքարյանին եւս մեկ նկատողություն արվեր, նա կզրկվեր դատավորի լիազորություններից: Սակայն ԲԴԽ-ն Ստեփան Սաֆարյանի գործով էլ այսօր որոշեց մերժել արդարադատության նախարարության միջնորդությունը:
Երբ ԲԴԽ նախագահ Գագիկ Ջհանգիրյանը հայտարարեց ԲԴԽ որոշումը, դատարանի դահլիճում Զարուհի Նախշքարյանի աջակիցները սկսեցին ծափահարել:
Կարդացեք նաև
Սակայն մյուս կողմը, բնականաբար, դժգոհ մնաց և չէր ծափահարում: Այս առիթով Գագիկ Ջհանգիրյանն ասաց. «Ես ուզում եմ հատուկ մյուս կողմի համար, որը չի ծափահարում, վկայակոչել ՀՀ դատական օրենսգիրք սահմանադրական օրենքի 142-րդ հոդվածի 2-րդ մասի հետևյալ կարգավորումը. արարքը չի համարվում կարգապահական խախտում, եթե այն թեև ձևականորեն պարունակում է սույն օրենքով սահմանված դատավորին կարգապահական պատասխանատվության ենթարկելու հիմքերի հատկանիշներ, սակայն իր նվազ կարևորության պատճառով կասկածի տակ չի դնում տվյալ դատավորի համապատասխանությունը դատավորի կարգավիճակին և իր էությամբ չի կարող հեղինակազրկել դատական իշխանությունը»:
Դատական նիստերի դահլիճում Ստեփան Սաֆարյանի աջակիցները որոշումի հրապարակումից հետո հայտարարեցին՝ խայտառակություն:
Տաթև ՀԱՐՈՒԹՅՈՒՆՅԱՆ
