Երբ վերջերս Եվրանեսթի նիստերի ժամանակ Երեւանում բողոքի ցույց եղավ՝ ընդդեմ Ադրբեջանի երկու պատվիրակների ժամանման, բերման ենթարկվեցին ՀՀ քաղաքացիները, եւ մի աղջկա ձեռք կոտրվեց։ ԱԺ մարդու իրավունքների պաշտպանության եւ հանրային հարցերի հանձնաժողովի նիստում այսօր ՀՀ կառավարության ծրագրի 2021թ․-ի կատարման ընթացքի եւ արդյունքների մասին զեկույցի քննարկման ժամանակ հանձնաժողովի նախագահ Թագուհի Թովմասյանն այս միջադեպը հիշեցրեց արդարադատության նախարար Կարեն Անդրեասյանին։
«Դուք ձեր զեկույցում ասում եք, որ ոստիկանական բաժանմունքներում տեսախցիկներ կան՝ քաղաքացիների հանդեպ հնարավոր բռնությունը կանխելու համար։ Ձեր տեսակետը ո՞րն է։ Չեմ լսել, որ տեսակետ արտահայտեք երիտասարդ աղջկա ձեռքը կոտրվելու առնչությամբ։ Ի՞նչ հանգամանքներում է դա եղել, ինչո՞ւ «անհրաժեշտություն» եղավ նրա ձեռքը կոտրելու»,-հարցրեց Թագուհի Թովմասյանը։
Կարեն Անդրեասյանը շեշտեց․ «Չկա նման անհրաժեշտություն։ Հասկանում եմ հեգնանքը․․․ցավ եմ ապրում աղջկա համար, որը վնասվել է։ Այո, տեսախցիկներ կան, բայց դրանք կարող են լինել միացված-չմիացված, գործակվող։ Դրանց արդյունքները կարող են կեղծվել։ Դա ոստիկանության ներքին ծառայողական քննության խնդիր է։ Ես ինքս չեմ զբաղվում, իրավունք չունեմ միջամտելու։ Ոստիկանությանն աջակցում ենք պարեկային ծառայության աշխատանքներում, բայց մենք քաղաքականություն մշակող ենք եւ իրավունք չունենք կոնկրետ գործերով գնալ-քննել, թե որ ոստիկանն իրեն ինչպես է դրսեւորել, էլ չասեմ՝ եթե ձեր ասածն իրականությանը մոտ է, այսինքն՝ դիտավորությամբ է եղել, ուրեմն դա արդեն խոշտանգման է տանում»։
Նախարարը հավելեց, որ նշյալ միջադեպի մանրամասներին չի տիրապետում։
Կարդացեք նաև
Լուիզա ՍՈՒՔԻԱՍՅԱՆ
