Արցախի հարցով «Անվտանգություն եւ ժողովրդավարություն» ՀԿ-ի կազմակերպած քննարկման ժամանակ Արցախի խորհրդարանի «Արդարություն» խմբակցության պատգամավոր Մետաքսե Հակոբյանը առաջարկեց ՀՀ-ին ճանաչել Արցախի հանրապետությունը: Aravot.am-ը այս առաջարկի հետ կապված խնդրեց «Հայաստան» խմբակցության պատգամավոր Արթուր Խաչատրյանին եւ ՀՀԿ անդամ, ՊՆ նախկին փոխնախարար Արտակ Զաքարյանին իրենց դիրքորոշումը հայտնել՝ առաջ ասում էին, որ դա մեր վերջին խաղաքարտն է, պետք է հասկանալ՝ որքանո՞վ է արդյունք տալու, անիմաստ չի կարելի ճանաչել, իսկ հիմա այդ վերջը չէ՞, ի՞նչ կարծիք ունեն:
Արթուր Խաչատրյանն ասաց. «Արցախի անկախությունը պետք էր ճանաչել պատերազմի ժամանակ, երբ անհասկանալի էր ՀՀ իշխանությունների արտաքին քաղաքականությունը, թե՝ այլ երկրներ ճանաչեն, երբ իրենք չէին ճանաչել: Այսօր ճանաչելը կարծում եմ սխալ չէ, ճիշտ մոտեցում պետք է լինի ու այդ գործընթացը պետք է մեկնարկել: Նախորդ իշխանություններն ասում էին, թե դա վերջին հանգրվանն է, եթե դա լինի, պատերազմ կարող է բերվի: Հիմա այդ հարցը պետք է քննարկվի ու վերջից մենք իրոք անցել ենք»:
Իսկ Արտակ Զաքարյանը պատասխանեց. «Արցախի հանրապետության ճանաչման լավագույն օրը 2020-ի հոկտեմբեր 10-ն էր, երբ Ադրբեջանը խախտեց ՌԴ-ի հետ 9 ժամյա բանակցությունների արդյունքում ձեռք բերված հրադադարի պայմանավորվածությունները: Եթե նույն Նիկոլը ողջ պատերազմի ընթացքում ինչքան օտարալեզու ԶԼՄ կար հարցազրույց էր տալիս՝ կոչ անելով ճանաչել Արցախը, ո՞ւմ պարզ չի, որ դա առաջինը պետք է աներ ՀՀ-ն: Բնականաբար, կունենար Ադրբեջանի վրա ճնշումների լայն հնարավորություն»:
Թե ինչու դա չարեցին իրենց իշխանությունների օրոք՝ Զաքարյանն ասաց, որ պատրաստել էին փաթեթը, սպասում էին կառավարության եզրակացությանը, հետո եղավ Վիեննայի եւ Սանկտ Պետերբուրգի պայմանավորվածությունը ու դա չարեցին:
Կարդացեք նաև
Հռիփսիմե ՋԵԲԵՋՅԱՆ
