«Նրա հոր հետ առիթ եմ ունեցել բազմաթիվ անգամ հանդիպել եւ զրուցել։ Հիշում եմ, թե ցեղասպանության 100-րդ տարելիցի ժամանակ Հյուսիսային համալսարանն ինչ մեծ միջոցառումներ էր անում, մի մեծ պաստառ ողջ տարվա ընթացքում պատին էր։ Եվ այսօր համալսարանի ռեկտորը, որը նախկին հարգարժան ռեկտորի որդին է, իրեն անհարգալից արտահայտություններ է թույլ տալիս»,-Արմավիրի մարզում Նիկոլ Փաշինյանի հրաժարականի պահանջով բողոքի երթի ժամանակ այսօր անդրադառնալով երեկվա միջադեպին, որի ժամանակ Հյուսիսային համալսարանի ռեկտոր Մհեր Մակիչյանը երիտասարդներին թույլ չէր տվել համալսարանում Արցախի դրոշ տեղադրել՝ ասաց «Հայաստան» խմբակցության պատգամավոր Գեղամ Մանուկյանը։
«Մտավորականներին, պատմաբաններին, գիտնականներին կոչ եմ անում՝ մենք 88-ի սերունդն ենք։ Հիշեք՝ եթե այն ժամանակ որեւէ ռեկտոր Արցախի դրոշի դեմ պայքարեր, ի՞նչ կանեին մտավորականները։ Ձեր բոլոր գրքերն ու հոդվածները զրո արժեք կունենային, եթե Արցախն ու ՀՀ-ն թուրքացվեին։ Դրա համար ոտքի կանգնեք, պայքարեք, հիշեք, թե 88-ին ուսանողությունն ինչպիսին էր»,-հավելեց Գեղամ Մանուկյանը։
Լուիզա ՍՈՒՔԻԱՍՅԱՆ
