Արմավիրի մարզում այսօր շարունակվում է Նիկոլ Փաշինյանի հրաժարականի պահանջով քայլերթը։ «Հակված չեմ արձագանքել իշխանական մի խումբ մարդկանց ցնդաբանություններին, բայց մեկին կուզեմ անդրադառնալ։ Լոռու մարզպետ կա՝ Արամ Խաչատրյան, որը նախկինում պատգամավոր էր պաշտպանության հանձնաժողովում։ Որպեսզի հիմնավորեին, թե ինչու էր նա ներառված ապրիլյան պատերազմը քննող հանձնաժողովում, նրան ներկայացնում էին որպես զինվորական։ Կարծում եմ՝ նա մայոր է։ Այդ ժամանակ ուսումնասիրեցի։ Կյանքում մարտական հենակետ եւ առաջնագիծ չտեսած մեկն այսօր իրեն թույլ է տալիս խոսել ՀՅԴ-ի մասին… Դրա նմաններն ինչպե՞ս են նայելու մեր աչքերի մեջ եւ ներողություն խնդրելու, ներողությունն ընդունվելո՞ւ է»,-ֆեյսբուքյան ուղիղ միացմամբ հայտարարեց «Հայաստան» խմբակցության պատգամավոր Գեղամ Մանուկյանը։
Հիշեցնենք՝ դեռեւս 2019թ․-ին պաշտպանության նախկին նախարար Սեյրան Օհանյանն ապրիլյան պատերազմի հանգամանքներն ուսումնասիրող քննիչ հանձնաժողովի անդամների հետ կապված ասել էր՝ «ովքե՞ր են էդ հանձնաժողովում, կեսից շատը բանակում չծառայածներ չե՞ն», եւ հանձնաժողովի անդամ, «Իմ քայլի» պատգամավոր Արամ Խաչատրյանն Aravot.am-ի հետ զրույցում արձագանքել էր․ «Ես 7 հոգու փոխարեն ծառայել եմ՝ 15 տարի»։
Գեղամ Մանուկյանը հավելեց․ «Մեկն էլ կա, որն անձնապես իմ եւ ընտանիքիս հետ կապված է գրություն արել։ Անունը չեմ տա, որովհետեւ հասարակությունում նրա անունը չեն օգտագործում…։ Խոստանում եմ մի բան՝ այդ տղան ծնկաչոք ներողություն է խնդրելու։ Խնդրելու է ու չի ընդունվելու։ Բայց կուզեմ դիմել Պապիկյան Սուրենին։ Պաշտպանության նախարարի պաշտոն է զբաղեցնում․ որքանով է արժանի, չգիտեմ, բայց առնվազն որպես նախարար՝ ձեր ՔՊ-ում նման ապուշություններ դուրս տվողների բերանը փակեք։ Փակեք հանուն բանակի եւ անվտանգության»։
Կարդացեք նաև
Լուիզա ՍՈՒՔԻԱՍՅԱՆ
