«Չկա անկլավների հարց: Նման հասկացություն չկա: Կա սահմանազատման եւ սահմանագծման հարց: Դրա ընթացքում արդեն կողմերը բազմաթիվ հանգամանքներ հաշվի առնելով՝ աշխարհագրական, քարտեզների, բնակչության դեմոգրաֆիայի, կարիքների եւ այլն, որոշում են ամենահարմար սահմանը երկու կողմերի համար»,- այսօր ԱԺ-ում լրագրողների հետ զրույցում ասաց ՔՊ պատգամավոր Արման Եղոյանը:
Դիտարկմանը՝ Բրյուսելի հանդիպումից հետո ընդդիմությունը հայտարարեց, որ Արցախի կարգավիճակի հարցը զիջեցիք, Շառլ Միշելը հայտարարել է, որ անհրաժեշտ է անդրադառնալ Ղարաբաղում էթնիկ հայ բնակչության իրավունքների ու անվտանգության հարցին՝ Եղոյանը հակադարձեց՝ ասելով, որ Շառլ Միշելը, որպես ԵԽ նախագահ, անհրաժեշտ է համարել այդ դիտարկումն անել. «Ինչի՞ վրա եք այդքան զարմացած: Դուք էլի դերակատարներին խառնել եք: Շառլ Միշելը Մինսկի խմբի համանախագահություն չի, չի զբաղվում ԼՂ հակամարտության լուծմամբ: Նախաձեռնել է եռակողմ հանդիպում՝ ՀՀ-ի ու Ադրբեջանի միջեւ մի շարք հարցեր մոտեցնել լուծման: Շառլ Միշելը, ինքը իր համար կարեւոր հարցի մասին է խոսում, դուք հարցնում եք՝ ինչո՞ւ իր համար կարեւոր չէ Արցախի կարգավիճակի հա՞րցը»:
Եղոյանը հայտարարեց, որ Արցախի կարգավիճակի հարցը նույն վիճակում է, ինչ 2016թ.-ի հունվարից ի վեր էր, այսինքն՝ թողնված է անորոշ ապագային: Դիտարկմանը՝ ԱԳՆ փոխնախարար Արա Այվազյանը վստահեցրեց, որ նման հորդոր չի եղել՝ նշաձողն իջեցնելու մասին՝ Եղոյանը պատասխանեց. «Թուղթը հայտարարությունից շատ ավելի ուժեղ է, կա Սերժ Սարգսյանի հրապարակած թուղթը, որի առաջին էջը հրապարակեց: Մեկդ չգնաց ասաց՝ բա մյուս էջերն էլ հրապարակի»:
Եղոյանն անդրադարձավ ԶԼՄ-ներից մեկին՝ ասելով, թե «դուք ձեր պատվիրատուների հռետորաբանությամբ ամենամեծ շահ զիջողն եք, ամենամեծ պրոբլեմ հարուցողն եք՝ ՀՀ անվտանգության համար»: Հարցին՝ հիմա Շառլ Միշելը Ադրբեջանի կազմո՞ւմ է պատկերացնում Արցախի կարգավիճակը՝ Եղոյանը պատասխանեց. «Ինքը այդ ձեւակերպումն է տվել: Ուզեցել է բալանսավորված հայտարարություն ունենա, պարզ չի՞ դա»: Թե ինչն է բալանսավորում՝ նա պատասխանեց. «Իր շահերը Ադրբեջանի ու Հայաստանի հետ, ուզում եք էմոցիոնա՞լ խոսեմ: Ինքը իր շահերն ունի ե՛ւ Ադրբեջանի, ե՛ւ Հայաստանի հետ»:
Կարդացեք նաև
Հռիփսիմե ՋԵԲԵՋՅԱՆ
