ԱԺԲ տաղավարում այսօր հյուրընկալված Աղավնոյի բնակիչ, «Ազգային ժողովրդավարական բեւեռի» անդամ, «Սասնա ծռեր» խմբի անդամ Մարտիրոս Հակոբյանը, որի հավաստմամբ ինքը եւս մի քանի հայ երիտասարդների հետ վերջինն է դուրս եկել Աղավնոյից, ասել է, թե գյուղը լքելու համար նախապես ժամանակ տվել էին մինչեւ օգոստոսի 25-ը, բայց իրենք իրենց տված ժամանակային բոլոր կանոնները խախտել են:
«Ամսի 8-ից 10-ից Ստեփանակերտի չակերտավոր ղեկավարները, որոնք իմ համար գոյություն չունեն, այցելելով Աղավնո գյուղ՝ անընդհատ խրախուսում էին, որպեսզի Աղավնոն շուտ լքենք: Խրախուսում էին գումարներով, սերտիֆիկատներով, թե բնակարանների համար պետք է 10 միլիոն դրամ տային: Դա ինչ-որ չափով առիթ դարձավ: Ես չեմ ուզում ասել, թե բացարձակ դուրս չէին գալու, բայց խրախուսելով այդ գումարներով՝ արագացնում էին: Ու անընդհատ գալիս՝ ասում էին. «Մինչեւ հիմա այստե՞ղ եք: Բա որ հեսա թուրքերը էկան, ի՞նչ եք անելու: Որ թուրքերից արդեն 7-8 հազար հատուկ ջոկատայիններ են եկել: Որ հանկարծ իջնեն գյուղ, չենք կարող ձեզ պաշտպանել, անվտանգությունն ապահովել: Այնպես որ, ինքներդ մտածեք»:
Ռուսներն էլ էին ասում, բայց վերադասների միջոցով: Իրենք ներկայանում էին որպես ազնիվ, պարկեշտ, բայց իրականում ավազակներ են, որովհետեւ իմ մեքենան առանց հիմքերի բռնագրավել են: 300 հազար դրամ է եղել մեքենայի մեջ, որից 250 հազարը՝ Կարմիր խաչի տված գումարն էր, որպեսզի դրանով իրերը տեղափոխենք»,-ասել է նա:
Մարտիրոս Հակոբյանը ցավով է արձանագրել, թե այսօր էլ չեն գիտակցում, որ փաստացի թուրքերը եկան-հասան Տեղ գյուղ, որն արդեն Սյունիքն է: Նա մտավախություն ունի. «Վաղը Սյունիքն են վերցնելու: Մինչեւ Արարատ գնալու են: Իրենք մեծ նպատակներ ունեն, Երասխավանն էլ են համարում իրենցը: Եթե Երեւանն են համարում ադրբեջանական, ես ուրիշ ի՞նչ ասեմ: Սա բառերով նկարագրելու չի: Եվ եթե մեր ժողովուրդը լսում է, կասեմ, որ մեր հաղթանակը մեր միասնության մեջ է: Եթե չէ, հավատացեք՝ մեծ մասամբ ոչխարի նման մորթելու են»:
Կարդացեք նաև
Աղավնոյի բնակիչը, որ իրեն դժվար պարտվող է համարում, հավատում է, որ վերադառնալու են Աղավնո, որ մեր ազգը ուշքի կգա եւ կհասկանա:
Աշոտ ՀԱԿՈԲՅԱՆ
