Այսօր ԱԺ պետաիրավական հարցերի հանձնաժողովի նիստում քննարկման ներկայացվեց «ՀՀ Վարչական իրավախախտումների մասին» օրենսգրքում փոփոխությունների նախագիծը: Ինչպես նշեց արդարադատության փոխնախարար Երանուհի Թումանյանցը, առաջարկվում է օրենքով նախատեսված տեղեկությունն ապօրինաբար չտրամադրելու համար սահմանված տուգանքը բարձրացնել: Մասնավորապես, գործող կարգավորմամբ նախատեսվում է տուգանք նվազագույն աշխատավարձի տասնապատիկից մինչեւ հիսնապատիկի չափով, հիմա առաջարկվում է տուգանել երեսնապատիկից մինչեւ յոթանասունապատիկի չափով: Իսկ նույն խախտումը վարչական տույժ կիրառելուց հետո 1 տարվա ընթացքում կրկնելու դեպքում կիրառել նվազագույն աշխատավարձի 100-ապատիկից մինչեւ 150-ապատիկի չափով տուգանք:
ԱԺ-ից առաջարկել են տեխնիկական որոշ ուղղումներ կատարել առաջին ընթերցումից հետո:
ՔՊ պատգամավոր Լիլիթ Մինասյանը հարցրեց. «Ուզում եմ հասկանալ՝ այս հարցի շուրջ մտածե՞լ եք, թե՞ ոչ. երբ հարցը վերաբերվում է կոնկրետ պաշտոնյային, նրան հարցում են ուղարկում, ապօրինաբար չի տրամադրում, հետո տույժ-տուգանքը նրա աշխատավարձից է պահվում: Բայց երբ հարցումն ուղարկվում է օրինակ աշխատակազմ կամ կառույց, այդ դեպքում տուգանքի միջոցներն ի՞նչ ձեւով են լինու, որովհետեւ եթե աշխատակազմի ղեկավարն է անփութություն ցուցաբերում ու չի պատասխանում հարցմանը, իսկ հետագայում, երբ գնում է դատարան, բյուջեն է վճարում: Այդտեղ կորում է պաշտոնյային անփութության դեպքում տույժ-տուգանքների ենթարկելու հնարավորությունը»:
Թումանյանցը պատասխանեց, որ այդ հարցով միջազգային փորձագետների են դիմել, որ պարզեն, թե ինչպես նույնականացումն անեն. «Ունենք փորձագիտական խումբ, որն աշխատում է այս պահին ամբողջ «Վարչական իրավախախտումների վերաբերյալ» նոր նախագծի վրա»: Փոխնախարարն ասաց, որ առայժմ տուգանքը բարձրացնելով շահագրգռում են քաղաքացիներին այդ խնդիրների դեպքում դիմել Վարչական դատարան:
Կարդացեք նաև
Վադիմիր Վարդանյանն արձագանքեց. «Ես տարակուսած եմ, որովհետեւ ես չեմ կարծում, որ այս կամ այն տուգանքի չափը, որը վճարելու է պետությունը, կաշկանդելու է պաշտոնյային, որովհետեւ ի վերջո սա հնարավոր կոնպենսացիոն գումարը չի, որը կարող է ստանա անձը՝ տեղեկատվություն չստանալու համար»: Վարդանյանը համաձայնեց, որ տուգանքի գործող չափն իսկապես ցածր է եւ պետության շահերից է բխում այս փոփոխությունը:
Ըստ ՔՊ խմբակցության պատգամավոր Սերգեյ Բագրատյանի, 150-200 հազար դրամ աշխատավարձ ստացող պաշտոնյայի համար 100 հազար դրամ տուգանքը կարող է մեծ լինել, բայց 1,5 մլն դրամ աշխատավարձ ստացող նախարարի համար այդ 50 հազար դրամը կարող է էական նշանակություն չունենալ: Նա առաջարկեց տոկոսով հաշվել, աշխատավարձի, ասենք, 20%-ի չափով տուգանել: Վլադիմիր Վարդանյանի դիտարկմամբ, ընդհանուր հայտարարագրման համակարգից հետո շատ ավելի տրամաբանական կլինի նման տոկոսային հարաբերակցությամբ տուգանքի կիրառումը:
Փոխնախարարն ասաց, որ վատ առաջարկ չէ, բայց դա նույնպես կարելի է քննարկել նոր «Վարչական իրավախախտումների վերաբերյալ» օրենսգրքի շրջանակներում, այս նախագծում դրա փոփոխությունը նպատակահարմար չէ:
ՔՊ պատգամավոր Վիգեն Խաչատրյանն ասաց. «Ես սկզբունքորեն կարծում եմ, որ տուգանքի չափ փոխելը ճիշտ չի, տուգանքով ոչ մի հարց չի լուծվելու»: Ըստ Վիգեն Խաչատրյանի, հլը պիտի խորանան, տեսնեն հարցումներն ովքեր են անում, ինչի են անում ու, ըստ այդմ, հետևություններ անեն:
Լիլիթ Մինասյանն ասաց, որ համաձայն չէ, թե այս նախագծով քաղաքացիները կշահագրգռվեն դիմել Վարչական դատարան, հիմնականում տեղեկատվություն ստանալու հարցմամբ դիմում են ԶԼՄ-ները ու երբ հարցմանը չեն պատասխանում, մեկ տարի դատարաններ դիմել ու նոր ստանալ այդ տեղեկատվությունը անարդյունավետ է, որովհետեւ այլեւս անիմաստ է դառնում այդ տեղեկատվությունը ստանալը: Ու դա է պատճառը, որ ԶԼՄ-ները չեն դիմում դատարան, իմաստ չեն տեսնում: Նա առաջարկեց բացի տուգանքները բարձրացնելուց, այլ մեխանիզմներ մտածել ու պաշտոնյաներին պատասխանատվության դաշտ բերել:
Նախագիծը դրական եզրակացություն ստացավ, բայց Վիգեն Խաչատրյանը դեմ քվեարկեց:
Հռիփսիմե ՋԵԲԵՋՅԱՆ
