Գյումրեցի ընդդիմադիր իրավապաշտպան Կարապետ Պողոսյանի տեղեկացմամբ, այսօր իրեն հրավիրել են ԱԱԾ՝ Շիրակի դատախազ Գուրգեն Գրիգորյանի մասին իր արած հայտարարությունների հետքերով:
«Ինձ հրավիրել են ԱԱԾ՝ տեղեկացնելով, որ մամուլով արած իմ հայտարարությունների հիման վրա հարուցվել է քրգործ: Հրավիրել են, որպեսզի ներկայացնեմ ՝ ինչ է տեղի ունեցել։
Անկեղծ ասած՝ ուզում եմ հավատալ, որ ԱԱԾ-ն իսկապես տրամադրված է գործի ամբողջական հանգամանքները բացահայտելու և ճիշտ իրավական գնահատական տալու։ Որպես առաջին քայլ՝ շատ կարևոր է, որ Շիրակի մարզի դատախազի պաշտոնավարումը կասեցվի, հակառակ դեպքում հավանականությունը, որ քրգործը մինչև վերջ արդար կգնա, կասկածի տակ է»,- ասաց Կարապետ Պողոսյանը։
Վերջինս ասաց, որ հստակ տեղեկություն չունի, թե Քրեական օրենսգրքի որ հոդվածով է քրեական գործ հարուցված, ինքն ԱԱԾ-ի կենտրոնական վարչություն է ներկայանալու այսօր ժամը 15․00-ին, շատ հարցերի պատասխան տեղում կստանա։
Կարդացեք նաև
Հիշեցնենք, որ Կարապետ Պողոսյանը մամուլի ասուլիս էր հրավիրել՝ աղմկոտ հայտարարություններ անելով։ Ըստ նրա, Շիրակի դատախազը իր նկատմամբ շինծու քրեական գործեր է հարուցել, և երբ ինքն այս մասին բարձրաձայնել է սոցիալական ցանցերում՝ քննադատելով դատախազին, վերջինս քրեական ենթամշակույթ ունեցող անձանց է ուղարկել իր մոտ՝ «գործարք առաջարկելով»։
Կարապետ Պողոսյանի այս հայտարարությունից հետո ՀՀ գլխավոր դատախազության կազմակերպական-վերահսկողական և իրավական ապահովման վարչությունում սկսվել էր ծառայողական քննություն՝ Շիրակի մարզի դատախազ Գուրգեն Գրիգորյանի նկատմամբ։
Նշենք, որ Կարապետ Պողոսյանի ասուլիսից հետո Aravot.am-ը դիմել էր գլխավոր դատախազություն՝ թեմայի շուրջ երկրորդ կողմի պարզաբանումները ևս լսելու, սակայն անարձագանք էր մնացել։
Նունե ԱՐԵՎՇԱՏՅԱՆ