Լոռեցիներին հայտնի Վարպետ Մնոն ֆեյսբուքյան իր էջում բարձրաձայնում է, որ վանաձորցիները զրկվում են իրենց սիրելի «Թթու ջրից»: Նա գրել է, որ մոտ մեկ շաբաթ է կառուցված ցայտաղբյուրից «Թթու ջուրը» գրեթե չի գալիս. «Ինչ-որ մեկը եկել է հանքից փականը փակել, եւ ջուրը այնքան է կամացացրել, որ երկու ցայտաղբյուրները լրիվ ցամաքել են։ Իսկ մայր աղբյուրը այնքան կամաց է գալիս, որ մեկ շիշ ջուր լցնելու համար պետք է ժամերով հերթ կանգնենք»,- գրել է Վարպետ Մնոն:
Վերջինս նշել է, որ որպես անհանգստացած քաղաքացի խնդրում է պատկան մարմինների ուշադրությունը, որպեսզի խնդրին տան լուծում:
Առաջիկայում Aravot.am-ը կփորձի կապ հաստատել համապատասխան անձանց հետ, պարզելու համար, թե ո՞րն է պատճառը:
«Թթու ջուր» կոչված այս տարածքը տասնամյակներ շարունակ համարվում է վանաձորցիների սիրելի տեսարժան վայրերից մեկը: Տեղանքը կոչվում է «Թթու ջուր», քանի որ այստեղ կառուցված 3 աղբյուրներից հանքային բնական ջուր է հոսում:
Տաթեւիկ ՂԱԶԱՐՅԱՆ
Լուսանկարները՝ Վարպետ Մնոյի
