Բրոկկոլիի օգտակար հատկությունների մասին բազմիցս խոսվել է․ այս կաղամբազգին վիտամինների, հանքանյութերի և հակաօքսիդանտների հարուստ աղբյուր է, սակայն մեր ուշադրությունն այսօր կկենտրոնացնենք բրոկկոլիի՝ հակաքաղցկեղային ակտիվության վրա, որն ունի այս մշակաբույսը սուլֆորաֆանի, բնական օրգանական ծծմբի և այլ միացությունների շնորհիվ:
Սուլֆորաֆանն օրգանական բուսական միացություն է, որն ունի հակաքաղցկեղային և հակաբակտերիալ ազդեցություն։ Սուլֆորաֆանն առաջանում է գլյուկորաֆանինից, որն ամենից շատ պարունակվում է կաղամբազգիների՝ բրոկկոլիի, ծաղկակաղամբի կազմում։
Ուսումնասիրությունները ցույց են տվել, որ սուլֆորաֆանը.
- Նպաստում է բջիջների նորմալ կենսագործունեությանն ու բաժանմանը, ունի իմունախթանիչ ազդեցություն։
- Ապոպտոզ (բջջի կենսաբանորեն ծրագրավորված մահ) է առաջացնում հաստ աղիքի, շագանակագեղձի, կրծքագեղձի, թոքերի քաղցկեղի բջիջների համար։
- Նպաստում է օրգանիզմի դետոքսիկացիային։
- Նվազեցնում է օրգանիզմում բորբոքման մարկեր համարվող C- ռեակտիվ սպիտակուցի մակարդակը:
- Օգնում է նվազեցնել ճարպակալման վտանգը։
- Պայքարում է աղիքային բակտերիաների որոշ տեսակների դեմ։
- Իջեցնում է գլյուկոզայի մակարդակը դիաբետով հիվանդների մոտ։
- Պայքարում է լյարդի ոչ ալկոհոլային ճարպային հիվանդության դեմ։
Կարդացեք նաև
Բրոկկոլիի՝ առողջությանը նպաստող այլ միացությունները
Բացի սուլֆորաֆանից, բրոկկոլին պարունակում է մի քանի այլ առողջարար սննդանյութեր և միացություններ, այդ թվում՝
- Բջջանյութ, որը բարելավում է աղիների միկրոֆլորան, ինչի շնորհիվ լավանում է իմունիտետի աշխատանքն ու նվազում բորբոքային հիվանդությունների զարգացման վտանգը։
- Ֆենոլային միացություններ, ներառյալ ֆլավոնոիդներ և ֆենոլաթթուներ, որոնք ազատ ռադիկալները և բորբոքային գործընթացները չեզոքացնող հատկություն ունեն։
- Նիկոտինամիդ մոնոնուկլեոտիդ կոչվող ֆերմենտ, որը կապվում է միտոքոնդրիումների առողջության և էներգիայի փոխանակության հետ:
Սակայն պատրաստելիս բրոկկոլիի օգտակար հատկությունները պահպանելու պարզ կանոններ կան։
Բրոկկոլին եփեք գոլորշու վրա 3-4 րոպե՝ սուլֆորաֆանի քանակը մեծացնելու համար, կամ եթե խաշում եք անմիջապես ջրում կապ պատրաստում միկրոալիքային վառարանում, ապա այդ գործընթացը պետք է տևի ընդամենը 1 րոպե։
Եթե նախընտրում եք բրոկկոլին ուտել հում վիճակում, ապա ընտրեք մատղաշ ծիլերը, որոնց կազմում հակաքաղցկեղային միացությունների, ներառյալ՝ սուլֆորաֆանի պարունակությունն ավելի շատ է։
Պատրաստեց Մարինե ԱԼԵՔՍԱՆՅԱՆԸ
