Ինչպե՞ս եք պատկերացնում Արցախի շրջափակման հարցի լուծումը. այսօր հրավիրած ասուլիսում վարչապետ Նիկոլ Փաշինյանը այս հարցին պատասխանեց, որ գործընկերների հետ չպետք վերջնագրերով խոսել. «Հրապարակային գնահատականներ տրվել են Լաչինի միջանցքը փակելու մասին: Իմ գնահատմամբ, այն, ինչ տեղի է ունենում Լաչինի միջանցքում, առաջին հերթին ԼՂ հայության՝ սեփական հայրենիքում ապրելու կամքը կոտրելու նպատակ ունի: ՀՀ կառավարության գործիքակազմը պետք է լինի դիվանագիտական, այն է՝ հնարավորինս մեծ ճնշում գործադրել միջազգային հանրությանը»:
Նա նորից մեջբերեց նոյեմբերի 9-ի հայտարարության 6-րդ կետը, որով իրավական պարտավորություններ են դրված Ադրբեջանի ու ՌԴ-ի վրա. «Այո, ռուս խաղաղապահները պետք է ապահովեն Լաչինի միջանցքի երթեւեկությունը: ՀՀ եւ ՌԴ ՊՆ նախարարների ստորագրությամբ կա այդ մանդատը, ճիշտ է, ադրբեջանական կողմն այդ փաստաթուղթը չի ստորագրել, բայց այդ փաստաթղթում չկա որեւէ նշում, որ այն ուժի մեջ է մտնում միայն երեք կողմերի ստորագրությունից հետո»:
Ըստ նրա, որեւէ այլ սուբյեկտ, քան ՌԴ-ն՝ Լաչինի միջանցքում պիտի վերահսկողություն չունենա:
Անդրադառնալով հայ-թուրքական հարաբերություններին, բեռնափոխադրումներին, նա ասաց. «Թուրքիայի նախագահի հետ հեռախոսազրույց ենք ունեցել, կարեւոր է, որ դինամիկա ունենանք հարաբերություններում: Հույս ունեմ,որ առաջիկայում երկու երկրների համար կբացվի սահմանը, ինչպես նաեւ դիվանագիտական անձնագրերով անձանց համար: Լոգիստիկայի լուրջ փոփոխություն է տեղի ունենում, այս տարածաշրջանը միջազգային բեռնափոխադրումների առումով շատ ավելի հետաքրքիր է դառնում: ՀՀ-ի եւ Թուրքիայի միջեւ սահմանի եւ հայ-թուրքական երկաթուղու բացումը շատ ավելի գլոբալ նշանակություն է ստանում»:
Կարդացեք նաև
Հռիփսիմե ՋԵԲԵՋՅԱՆ
