Սյունիքի տարածաշրջանային պետական քոլեջի տնօրեն Անժելա Մաքյանի նկատմամբ քրեական հետապնդումը դադարեցվել է արդարացման հիմքով, եւ կրթության, գիտության, մշակույթի եւ սպորտի նախարարի հրամանով՝ Անժելա Մաքյանի լիազորությունները վերականգնվել են։ Այս մասին տեղեկացրել է Անժելա Մաքյանը իր ֆեյսբուքյան էջում։
«Սա արդարության հաղթանակն է անարդարության դեմ: Սա բարոյականության հաղթանակն է անբարոյականության դեմ: Սա մարդկային հզոր կամքի, ճշմարտության եւ ազնվության խոսուն հաղթանակն է ամեն վայրկյան խոնարհվելու եւ նվաստացած ապրելու պատրաստ ապականված հոգու տեր մարդկանց նկատմամբ։ Իմ զենքը գրիչն է, պաշտոնը՝ կրթությունը: Ավելի լավ է ապրել արժանապատիվ՝ ազատ ու սկզբունքային, մարդկային արժեհամակարգով ու հոգեկերտվածքով, քան ծնկաչոք ու վաղվա հրամանի վախով՝ միշտ պատրաստ խոնարհումի»,-գրել է տիկին Մաքյանը
Հիշեցնենք, որ ըստ մեղադրանքի՝ Մաքյանը` 2014-2016թթ. իր պարտականությունների կատարման նկատմամբ անփույթ վերաբերմունքի հետեւանքով, կազմակերպությունում աշխատող 22 դասախոսների կողմից ուսանողների ՀՀ-ից դուրս գտնվելու պարագայում բացականեր չեն նշանակվել։ Նրանց քոլեջից դուրս թողնելու փոխարեն՝ տվել է դիպլոմներ։ Քրեական գործը հարուցվել էր 2021թ․-ի նոյեմբերին։ Այդ ժամանակ Անժելա Մաքյանը ֆեյսբուքյան գրառմամբ նշել էր, որ իր դեմ հարուցված քրեական գործը բացահայտ քաղաքական հետապնդում է։ «Որդուս` Գոռ Թադեւոսյանի՝ «Շանթ դաշինք» ազգայնական կուսակցության թեկնածու առաջադրվելու նախօրեին ՊՎԾ-ն մշտադիտարկում իրականացրեց «Սյունիքի տարածաշրջանային պետական քոլեջ» ՊՈԱԿ-ում։ Քաղաքական իշխանության կողմից իրականացվում են բոլոր միջոցները նախընտրական շրջանում կասեցնելու որդուս մասնակցությունը Կապանի ավագանու ընտրություններին»,-գրել էր նա։
Հանրային քրեական հետապնդումը դադարեցվել է Սյունիքի մարզի դատախազության ավագ դատախազ Ֆրունզե Հովհաննիսյանի որոշմամբ։ Նույն որոշմամբ վերացվել է նաեւ Մաքյանի նկատմամբ կիրառված խափանման միջոցը՝ ստորագրություն չհեռանալու մասին։
Կարդացեք նաև
Մոտ մեկ ամիս առաջ գրել էինք, որ մեր տեղեկություններով, ՀՀ քննչական կոմիտեի Սյունիքի մարզային քննչական վարչությունում, օրեր առաջ նոր քրեական վարույթ է նախաձեռնվել «Սյունիքի տարածաշրջանային պետական քոլեջ» ՊՈԱԿ-ի տնօրեն Անժելա Մաքյանի նկատմամբ։ Մաքյանը, ըստ ահազանգի, պաշտոնեական դիրքը օգտագործելով ՝ քոլեջից հափշտակել է իրեն վստահված գույքը։ Վարույթը հարուցվել է «ՀՀ քրեական օրենսգրքի» 446-րդ հոդ. 1-ին մասի (պաշտոնատար անձի կողմից իր ծառայողական պարտականությունների կատարման նկատմամբ անբարեխիղճ կամ անփույթ վերաբերմունքի հետեւանքով դրանք չկատարելը կամ ոչ պատշաճ կատարելը, որն անզգուշությամբ էական վնաս է պատճառել անձի կամ կազմակերպության իրավունքներին, ազատություններին կամ օրինական շահերին կամ հասարակության կամ պետության օրինական շահերին) ՝ հատկանիշներով։
Քննչական կոմիտեի նախագահի մամուլի խոսնակ Գոռ Աբրահամյանը Aravot.am-ի հարցմանը՝ ի պատասխան նշեց, որ հունիսին նոր քրեական վարույթ չի նախաձեռնվել։ «2023թ․ հունվարին, այսինքն` հաստատության ՊՈԱԿ տնօրենի նկատմամբ քրեական հետապնդումը դադարեցնելու որոշումը հսկող դատախազի կողմից կայացվելուց ամիսներ առաջ, նախաձեռնվել է քրեական վարույթ՝ ՀՀ քրեական օրենսգրքի 256-րդ հոդվածի 3-րդ մասի 3-րդ կետի եւ 445-րդ հոդվածի 1-ին մասի հատկանիշներով, որը միացվել է 2021թ․ հարուցված եւ նույն հաստատության վերաբերյալ քննվող քրեական այլ վարույթի։ Նախաքննությունը շարունակվում է, այս պահին նշված վարույթով ՊՈԱԿ-ի տնօրենի նկատմամբ հանրային քրեական հետապնդում չկա հարուցված»,-նշեց Գոռ Աբրահամյանը։
Արմեն ԴԱՎԹՅԱՆ
Լուսանկարը՝ Անժելա Մաքյանի ֆեյսբուքյան էջից
