Հակարիի կամրջի վրա տեղադրված ապօրինի անցակետում Ադրբեջանի հատուկ ծառայությունների կողմից Հայաստանի բուհերում ուսումնառության մեկնող արցախցի երեք հայ երիտասարդների առեւանգման մասին լուրը պաշտոնապես հաստատվելուց հետո Երեւանում երիտասարդներն ինքնաբուխ հավաքվել էին ՌԴ դեսպանատան առջեւ։
Ըստ Արցախի մարդու իրավունքների պաշտպանի տարածած տեղեկատվության, 22-ամյա Ալեն Սարգսյանին ադրբեջանցիները անհայտ ուղղությամբ տարել են ուժի կիրառմամբ եւ հարկադրանքի միջոցով, իսկ Վահե Հովսեփյանն ու Լեւոն Գրիգորյանը, որոնց անունները եղել են ռուս խաղաղապահների ցուցակում, սահմանը չեն հատել, սակայն նրանց հետ կապ հաստատել չի հաջողվում։
Երեւանում երիտասարդները պահանջում են, որ Ռուսաստանի դեսպանատան ներկայացուցիչը դուրս գա եւ բացատրություն տա, թե ինչպես է պատահել, որ ռուս խաղաղապահների ուղեկցության պայմաններում ադրբեջանցիները կարողացան անհայտ ուղղությամբ տանել հայ տղաներին, ու ռուս խաղաղապահները չկարողացան այդ առեւանգումը կանխել, թույլ չտալ։ «Այս անգամ Կարմիր Խաչը չի եղել, որը զենք չունի, ուղեկցողը եղել է ռուս խաղաղապահ զորակազմը։ Նրանք են ուղեկցել նախօրոք համաձայնեցված ցուցակով մարդկանց, եղել նրանց անվտանգության պատասխանատուն։ Պահանջում ենք, որ նրանք վերադարձնեն մեր եղբայրներին, դա լինի բանակցություններով, թե ուժի կիրառմամբ»,-ասում են ակցիայի մասնակից երիտասարդները, որոնք փակել են Գրիգոր Լուսավորիչ-Զաքյան փողոցների խաչմերուկը։
Կարդացեք նաև
Երիտասարդները իրենց տարեկիցներին հրավիրում են՝ մասնակցելու ակցիային։ «Սա մեկ ընտանիքի խնդիր չէ, սա ամբողջ Արցախի ու ամբողջ Հայաստանի խնդիրն է։ դեռ ամիսներ առաջ մենք բարձրաձայնում էինք, որ այս ապօրինի անցակետը դառնալու է չակերտավոր հանցագործներ բռնելու, «ռազմական հանցագործներ» կալանավորելու բիրտ գործիք թշնամու համար։ Այո, թշնամու, որովհետեւ քո հարեւանը, որի հետ ուզում ես խաղաղ ապրել, չի կարող բռնել, առեվանգել ու առանց որեւէ հիմքի անհայտ ուղղությամբ տանել քո հայրենակցին։ Ես կոչ եմ անում Հայաստանի հանրապետությունում գտնվող բոլոր արցախցի ուսանողներին, եկեք, միացեք մեզ, ձեր հետ բերեք ձեր բոլոր համակուրսեցիներին։ Սա բոլոր ուսանողների խնդիրն է, այս թակարդը կախված՝ սպասում է բոլորին»,- ասաց Լիանա Պետրոսյանը։
Աշոտ ՀԱԿՈԲՅԱՆ
