«Ազատություն». Թեհրանն իր անթաքույց դժգոհությունն է հայտնում սեպտեմբերի 11-ին Հայաստանում մեկնարկած համատեղ հայ-ամերիկյան զորավարժությունների առթիվ։ Իրանի ԱԳ նախարար Հոսեյն Ամիր Աբդոլահիանն այս մասին նշել է իր հայաստանցի պաշտոնակից Արարատ Միրզոյանի հետ նախօրեին կայացած հեռախոսազրույցի ընթացքում։
«Անդրադառնալով Հայաստանի և Միացյալ Նահանգների կողմից անցկացվող համատեղ զորավարժություններին՝ Աբդոլահիանը նշել է, որ տարածաշրջանում օտար ուժերի ցանկացած ներկայություն կարող է էլ ավելի բարդացնել իրավիճակը», – նշված է Իրանի ԱԳՆ տարածած հաղորդագրության մեջ։
Իրանի Իսլամական Հանրապետության դիվանագիտական գերատեսչությունը նաև նշում է՝ նախարար Աբդոլահիանը Արարատ Միրզոյանին ասել է, որ հարատև խաղաղության հասնելու համար հարկավոր է կենտրոնանալ առկա տարաձայնությունների հիմնարար պատճառների վերացման վրա։
«Համապարփակ խաղաղության հասնելու ամենաարդյունավետ ձևը տարածաշրջանային բանակցություններն ու մեխանիզմներն են, այդ թվում՝ 3+3 ձևաչափը», – Հայաստանի դիվանագիտական գերատեսչության ղեկավարի հետ զրույցում նշել է Իրանի ԱԳ նախարարը։
Կարդացեք նաև
Ուշագրավ է, ի դեպ, որ Միրզոյան- Աբդոլահիան հեռախոսազրույցի մասին՝ Հայաստանի ԱԳՆ կողմից երեկ երեկոյան տարածած հաղորդագրության մեջ հայ-ամերիկյան զորավարժությունների մասին որևէ հիշատակում չկա։
Գեւորգ ՍՏԱՄԲՈԼՑՅԱՆ
Նյութն ամբողջությամբ՝ սկզբնաղբյուր կայքում:
