«Սոթքի հանքավայրը մասնակի աշխատում է, փակ հանքում աշխատանքներն իրականացվում են։ Եղել է բաց մաս, որը մի քանի ամիս է՝ չի աշխատում»,- այս մասին խորհրդարանում լրագրողների հետ ճեպազրույցում ասաց Գեղարքունիքի մարզպետ Կարեն Սարգսյանը։ Նա նշեց, որ Պաշտպանության նախարարությունը վերջին օրերին հաղորդագրություններ է տարածում, մարզում կրակոցների մասին ոչ մի լուր չկա։
Մարզպետը նշեց, որ մարզում կյանքը բնականոն հունով շարունակվում է, մարդիկ չեն արտագաղթում։ «Բերքահավաքը մոտենում է ավարտին, մարդիկ բերքահավաքով են զբաղված»։- ասաց նա։
Հարցին, թե ինչպե՞ս է տեսնում անվտանգային խնդիրների լուծումը, Գեղարքունիքի մարզպետը պատասխանեց. «Ադրբեջանական զինված ուժերը պետք է հետ գնան ու դուրս գան Հայաստանի Հանրապետության տարածքից»։
Կարեն Սարգսյանն ասաց, որ Արցախից բռնի տեղահանված անձինք տեղակայված են Գեղարքունիքի բոլոր համայնքներում, ամենաշատը Սեւան խոշորացված համայնքում են տեղակայվել։ «Աշխատանքներ ենք իրականացնում, որպեսզի մեր հայրենակիցները վարձով տներ գտնեն եւ տեղափոխվեն վարձով տներ»,- ասաց նա՝ հավելելով, որ ներկայում հյուրանոցներում, հյուրատներում ու սեփական տներում են տեղակայված արցախցիները։
Կարդացեք նաև
Ռոզա ՀՈՎՀԱՆՆԻՍՅԱՆ
