ԲՈՂՈՔԻ ՀԱՅՏԱՐԱՐՈՒԹՅՈՒՆ
Արցախի մշակույթի և զբոսաշրջության զարգացման գործակալությունը խոր վրդովմունք և մտահոգություն է հայտնում ՅՈՒՆԵՍԿՕ-ի Համաշխարհային ժառանգության կենտրոնի փոխտնօրեն Ջյոթի Հոսագրահարի՝ Երևանում արած այն հայտարարության կապակցությամբ, թե տեղյակ չէ Արցախում հայկական եկեղեցիների ոչնչացման դեպքերի մասին։
Արցախի հայկական մշակութային և կրոնական ժառանգության ոչնչացման, վնասման և պատմական ինքնության խեղաթյուրման վերաբերյալ ահազանգերն ու փաստագրական նյութերը վաղուց ներկայացվում են հետազոտողների և հասարակական կազմակերպությունների կողմից։ ՅՈՒՆԵՍԿՕ-ի՝ համաշխարհային ժառանգության պաշտպանության համար պատասխանատու կառույցի բարձրաստիճան ներկայացուցչի նման անտեղյակությունը լուրջ հարցեր է առաջացնում։
Արցախի հայկական եկեղեցիներն ու վանքերը համամարդկային մշակութային ժառանգության անբաժանելի մասն են։ Դրանց պաշտպանությունը չպետք է պայմանավորված լինի քաղաքական շահերով։
Կարդացեք նաև
Կոչ ենք անում ՅՈՒՆԵՍԿՕ-ին ուսումնասիրել առկա փաստերն ու վկայությունները, ապահովել Արցախի հայկական հուշարձանների վիճակի անկախ միջազգային մշտադիտարկում և ձեռնարկել գործուն քայլեր դրանց հետագա ոչնչացումն ու պատմական ինքնության խեղաթյուրումը կանխելու համար։
Մշակութային ժառանգության պաշտպանությունը պահանջում է ոչ թե լռություն կամ անգործություն, այլ պատասխանատվություն և կոնկրետ գործողություններ։
Ակնկալում ենք ՅՈՒՆԵՍԿՕ-ի հստակ դիրքորոշումն ու գործուն քայլերը՝ Արցախի հայկական մշակութային ժառանգության պահպանության ուղղությամբ։
Արցախի մշակույթի և զբոսաշրջության զարգացման գործակալություն
