«Մենք համոզված ենք, որ այս գործով արդարադատությունը վերականգնվելու է եւ համոզված ենք, որ այս գործով չի կարող արձակվել այլ դատական ակտ, քան արդարացման վճիռը»,- այսօր «Դիզվառելիքի գործով» նիստի ավարտից հետո լրագրողների հետ զրույցում ասաց ՀՀ երրորդ նախագահ Սերժ Սարգսյանի պաշտպան Ամրամ Մակինյանը՝ հավելելով, որ այս գործը չի ունեցել հանցագործության ակտ, ինչի մասին տարիներ շարունակ խոսել են:
«Այն մարդիկ, ովքեր այս գործը փաթեթավորել են, թխել են եւ վառել են՝ վատ թխելու արդյունքում, ովքեր ինձ լսում են, ձեր աչքերի մեջ նայելով եմ ասում, պատասխան եք տալու՝ արդարադատության, սերունդների, հետո էլ Աստծո առաջ»,- հայտարարեց Ամրամ Մակինյանը:
Պաշտպանն ակնկալիքներ ունի միայն փաստերից, Հայաստանում իրականացվող արդարադատությունից, «նիկոլփաշինյանական արդարադատությունից» ակնկալիք չկա, արդարադատությունը լինելու է «այս մարդկանց գնալուց հետո»:
Այլ մանրամասները՝ տեսանյութում
Կարդացեք նաև
Երեւանի ընդհանուր իրավասության քրեական դատարանի Ավան եւ Նոր-Նորք նստավայրում, դատավոր Վահե Միսակյանի նախագահությամբ, այսօր շարունակվեց «Դիզվառելիքի գործով» դատավարությունը: Հիշեցնենք, որ դատախազը պահանջել էր այս գործով մեղադրյալներին՝ ՀՀ երրորդ նախագահ Սերժ Սարգսյանին, «Ֆլեշ» ընկերության սեփականատեր Բարսեղ Բեգլարյանին եւ գյուղնախարարության նախկին պաշտոնյա Գեւորգ Հարությունյանին ճանաչել մեղավոր եւ ազատել պատասխանատվությունից՝ վաղեմության ժամկետի հիմքով:
Այսօր դատարանում հնչեցին գործով մեղադրյալ, ՀՀ երրորդ նախագահ Սերժ Սարգսյանի պաշտպանների ճառերը: Պաշտպան Ամրամ Մակինյանը պահանջեց՝ հռչակել Սերժ Սարգսյանի անմեղությունը :
Հիշեցնենք, որ այդ գործով ՀՀ երրորդ նախագահ Սերժ Սարգսյանին մեղադրանք է առաջադրված առանձնապես խոշոր չափերով յուրացման/վատնման համար․ ըստ մեղադրանքի, նրա կազմակերպմամբ եւ «Ֆլեշ» ընկերության սեփականատեր Բարսեղ Բեգլարյանի դրդմամբ՝ 2013թ․ հունվարից մինչեւ փետրվարը կառավարության պահուստային ֆոնդից վատնվել է պետական աջակցության ծրագրերի իրականացման ընթացքում 15 391 765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489 160 310 ՀՀ դրամ: Այս գործով մեղադրյալի կարգավիճակում էին նաեւ ՀՀ գյուղատնտեսության նախկին նախարար Սերգո Կարապետյանն ու նրա տեղակալ Սամվել Գալստյանը, որոնց նկատմամբ քրեական հետապնդումը դադարեցվել է․ նախկին պաշտոնյաները մահացել էին կորոնավիրուսից։
Նելլի ԳՐԻԳՈՐՅԱՆ
