«Ինքս էական հիմքեր տեսնում եմ, որոնք եթե դատախազությունն ընդունի, կարող ենք գալ հաշտության, քանի որ իրականում աբսուրդ պահանջ է ներկայացված։ Երբ պահանջը խելամիտ լինի, այդ մասով կարելի է հաշտություն կնքել»,- Aravot.am-ի հետ զրույցում ասաց Սերժ Սարգսյանի թիկնազորի նախկին պետ Վաչագան Ղազարյանի պաշտպան Վարազդատ Ասատրյանը։
Սերժ Սարգսյանի թիկնազորի նախկին պետ Վաչագան Ղազարյանի գործով նիստը Հակակոռուպցիոն դատարանում այսօր կրկին հետաձգվեց։
Հիշեցնենք, կողմերը բանակցում են հաշտության համաձայնագիր կնքելու շուրջ։
Հիշեցնենք նաև, որ 2023 թվականի տարեվերջին հայտնի դարձավ, որ Վաչագան Ղազարյանը պետությանը կվերադարձնի Եռաբլուրի հարակից տարածքներում գտնվող հողակտորները։
Կարդացեք նաև
Պաշտպանից հետաքրքրվեցինք, թե էլ ինչ գույք կա, որը Վաչագան Ղազարյանը պատրաստ է վերադարձնել պետությանը։ Պաշտպանն ասաց, որ հարցին հստակ պատասխաններ չի կարող տալ, քանի որ դեռևս քննարկումների և ճշգրտումների փուլում են. «Կարծում եմ, որ դեռ վաղ է այդ մասին խոսելը։ Մի փոքր էլ սպասեք, կերևա»։
Նելլի ԳՐԻԳՈՐՅԱՆ