Բելգիայի Ներկայացուցիչների պալատը միաձայն ընդունել է բանաձև, որով հստակ աջակցություն է հայտնում Հայաստանի խաղաղության օրակարգին և Հայաստան-Եվրոպական միություն հարաբերությունների հետագա խորացմանը, հայտնում է Բելգիայում ՀՀ դեսպանությունը:
Ինչպես հաղորդում է Բրյուսելում «Արմենպրես»-ի թղթակիցը՝ բանաձևի հեղինակը պատգամավոր Միշել դը Մաեգդն է, իսկ դրա ընդունումը կարևոր քաղաքական նշանակություն ունի՝ հատկապես 2026 թվականին Երևանում նախատեսվող Եվրոպական քաղաքական համայնքի գագաթնաժողովի և ԵՄ–Հայաստան գագաթնաժողովի նախաշեմին։
Բանաձևին կողմ է քվեարկել 134 կողմ, դեմ և ձեռնպահ քվեարկողներ չեն եղել։
Ընդունված փաստաթուղթը հերթական անգամ վերահաստատում է, որ Բելգիայի բոլոր խորհրդարանական քաղաքական ուժերը միասնական դիրքորոշում ունեն Հայաստանի հետ գործընկերության զարգացման և երկրի խաղաղությանն ուղղված նախաձեռնություններին աջակցելու հարցում։ Բանաձևի միաձայն ընդունումը վկայում է, որ Բելգիայում առկա է լայն քաղաքական համաձայնություն՝ Հայաստանի հետ երկկողմ հարաբերությունները որակապես նոր մակարդակի բարձրացնելու շուրջ։
Կարդացեք նաև
Այս որոշումը կարևոր ուղերձ է ոչ միայն Հայաստան-Բելգիա հարաբերությունների զարգացման տեսանկյունից, այլև ավելի լայն՝ Հայաստան-Եվրոպական միություն մերձեցման համատեքստում։ Այն ընդգծում է, որ եվրոպական քաղաքական շրջանակներում շարունակվում է Հայաստանի նկատմամբ աջակցության ամրապնդումը՝ որպես խաղաղության, կայունության և տարածաշրջանային համագործակցության խթանման կարևոր նախապայման։
