Ադրբեջանի փոխվարչապետ Շահին Մուստաֆաեւի հայաստանյան այցը, Երեւանի նախկին քաղաքապետ Ալբերտ Բազեյանի համոզմամբ, ՔՊ-ին աջակցելու մասին վկայող Ադրբեջանի քայլն է:
«Ադրբեջանն ու թուրքական իշխանությունը ցուցադրում են իրենց քաղաքական աջակցությունը ՀՀ գործող թրքամետ իշխանություններին: Գալիս են աջակցելու Նիկոլ Փաշինյանին»,- այսօր «Հայելի» ակումբում ասաց Բազեյանը:
Անդրադառնալով Փաշինյանի պնդումներին, թե հունիսի 7-ին իրենց չընտրվելու դեպքում սեպտեմբերին պատերազմ է լինելու, Բազեյանն ասաց. «Ի՞նչ է, բախտագուշա՞կ է, որ նման բաներ է ասում: Որեւէ քաղաքական ուժ, որը հայտ է ներկայացրել այս ընտրություններին մասնակցելու, չի հայտարարել, որ իշխանության գալու դեպքում պատերազմ է սկսելու: Մեզ բավականաչափ ժամանակ է պետք իշխանափոխությունից հետո մեր ներքին խնդիրները կարգավորելու, բանակը հզորացնելու, արտաքին ռազմաքաղաքական գործընկերների հետ հարաբերությունները կարգավորելու համար, նոր հետո որոշելու՝ հնարավորություն ունե՞նք պատերազմով Արցախն ազատագրելու, թե՝ ոչ»:
Եվ վերջում խոսելով հունիսի 7-ին նախատեսված խորհրդարանական ընտրությունների մասին, Բազեյանն ասաց՝ բոլոր հարցումներով 4 ուժ կհայտնվի նոր խորհրդարանում՝ Գագիկ Ծառուկյանի դաշինքը, ՔՊ-ն, «Հայաստան» դաշինքը եւ «Ուժեղ Հայաստանը». «Երեքը միանալով իրար՝ հնարավորություն ունեն ավելի շատ քանակով պատգամավորներ ունենալ ու իրենց մեջից ամենաշատ ձայներ հավաքած քաղաքական ուժի ներկայացուցչին ընտրել որպես երկրի վարչապետ»:
Կարդացեք նաև
Արփինե ՍԻՄՈՆՅԱՆ
