ՀՀԿ ԳՄ անդամ Արտակ Զաքարյանը ֆեյսբուքյան իր էջում գրում է.
«Չինաստանը ներկայացրել է նոր սերնդի միկրոալիքային զենք՝ մինչև 100 ԳՎտ հզորությամբ
Չինացի գիտնականներն առաջին անգամ բացահայտել են բարձր հզորության միկրոալիքային (High-Power Microwave, HPM) համակարգերի մանրամասները, որոնց առավելագույն հզորությունը հասնում է մինչև 100 գիգավատի։
Ռազմարդյունաբերության ներկայացուցիչների տվյալներով՝ ըստ South China Morning Post-ի հրապարակման, այս համակարգերն արդեն դուրս են եկել լաբորատոր փորձարկումների փուլից, և դրանց մի մասը փոխանցվել է շահագործող ռազմական ստորաբաժանումներին։
Կարդացեք նաև
Ի տարբերություն ավանդական հակաարբանյակային զենքերի, որոնք հրթիռի միջոցով ֆիզիկապես ոչնչացնում են թիրախը, բարձր հզորության միկրոալիքային զենքը նախատեսված է էլեկտրոնային սարքավորումները խոցելու համար։ Կարճատև, սակայն չափազանց հզոր էլեկտրամագնիսական իմպուլսը կարող է շարքից հանել կամ լրջորեն խաթարել զգայուն էլեկտրոնային համակարգերի աշխատանքը՝ առանց օբյեկտի մեխանիկական ոչնչացման։
Չինական նոր համակարգերի հիմնական նշանակությունը համարվում է ժամանակակից ցածր ուղեծրային արբանյակների դեմ պայքարը, առաջին հերթին՝ կապի և հետախուզության համակարգերի (ինչպիսիք են, օրինակ, Starlink-ը), որոնք ժամանակակից զինված հակամարտություններում ավելի ու ավելի կարևոր դեր են ստանձնում։
Տեսականորեն նման համակարգերը կարող են կիրառվել նաև անօդաչու թռչող սարքերի, ինքնաթիռների, թևավոր հրթիռների, ինչպես նաև ցամաքային հրամանատարական կետերի և ռադիոլոկացիոն կայանների դեմ։
100 ԳՎտ հզորությամբ համալիրը բաղկացած է մի քանի իմպուլսային աղբյուրներից, որոնք միաժամանակ ձևավորում են միասնական գերհզոր միկրոալիքային իմպուլսներ։ Համալիրի սնուցման համար չինացի ինժեներները մշակել են նոր հիբրիդային լիթիում-իոնային համակարգ, որը կարող է գործարկվել նույնիսկ մինչև −40 °C ջերմաստիճանի պայմաններում, ինչը հնարավորություն է տալիս համակարգը կիրառել նաև կլիմայական խիստ պայմաններում։
Մշակողների խոսքով՝ հետագա աշխատանքները կենտրոնանալու են էներգետիկ ճառագայթի ուղղորդման ճշգրտության բարձրացման, սարքավորումների չափերի փոքրացման և արտադրության արժեքի նվազեցման վրա։
Հարկ է նշել, որ մինչ օրս չկան անկախ հաստատումներ նման համակարգերի՝ իրական արբանյակների դեմ հաջող կիրառման վերաբերյալ։ Հրապարակված տեղեկությունները հիմնականում արտացոլում են չինացի մշակողների հայտարարությունները և առաջին հերթին վկայում են այն մասին, որ Պեկինն ակտիվորեն զարգացնում է էլեկտրամագնիսական զենքի ուղղությունը՝ որպես թանկարժեք հակաարբանյակային հրթիռներին հնարավոր այլընտրանք։
Աղբյուրը՝ www.scmp.com»։
