«Ուժեղ Հայաստան» կուսակցության առաջնորդ Սամվել Կարապետյանը ամբողջ հայության խայտառակություն է համարում Ամենայն հայոց կաթողիկոսի՝ դատարանում մեղադրյալի կարգավիճակով գործի մեկնարկը։
«Ինձ թվում է, որ իրենք ուշքի կգան՝ այս իշխանությունները, բայց դեռ շարունակում են»,- լրագրողների հետ զրույցում ասաց Կարապետյանը։
Անդրադառնալով իշխանությունների հասցեին իր արած «գյորմամիշ» արտահայտությանը, որից հետո երեկ խորհրդարանում ՔՊ-ական Տարոն Չախոյանի և Նարեկ Կարապետյանի միջև միջադեպ գրանցվեց, Սամվել Կարապետյանը, պատասխանեց հարցին, թե պատրաստվո՞ւմ է վերանայել իր խոսույթը.
Կարդացեք նաև
«Ո՞ր խոսույթը։ Եթե ինձ հարցնում են իմ բիզնեսները խլելու մասին, ես ավելի հետաքրքիր խոսույթ ունեմ»։
Անդրադառնալով Նիկոլ Փաշինյանի հայտարարությանը, թե ՀԷՑ-ը դառնալու է պետական սեփականություն, Կարապետյանը պատասխանեց.
«Իրենք դեռ պետք է կարողանան խլել, որ հանձնեն կառավարման։ Դրա համար գոյություն ունեն ՀՀ և միջազգային դատարաններ։ Հիմա մենք պայքարում ենք իրենց ապօրինությունների դեմ։ Եվրոպական դատարաններում քայլ առ քայլ գնում ենք առաջ»։
Ինչ վերաբերում է խորհրդարանից հնչող հայտարարություններին, թե ՀԷՑ-ը հավելագրումներ է արել մանկապարտեզների և բանակի վրա՝ կտրելով զինվորի ու երեխաների հացը, Կարապետյանն ասաց.
«Ստիպված կրկնում են մի բան, որը իրենց քաղաքական ղեկավարն ասում է, կրկնում են, դրա դիմաց չունենալով ոչ մի ապացույց։ Բայց ՀԷՑ-ը գործող մարմին է, մոտ 3000 մարդ հնարավորություն ունի այդպիսի ապօրինություն անել։ Հիմա Փաշինյանը մսխել է 8.5 միլիարդ դոլար. ի՞նչ, կանգնենք ասենք՝ 8.5 միլիարդը կերե՞լ է։ Չնայած, գուցե ինչ-որ մասից ինքն օգտվել է, բայց այդպիսի հայտարարությունները անպատասխանատու հայտարարություններ են»։
Արփինե ՍԻՄՈՆՅԱՆ
