Սեպտեմբերի 3-ին Եվրոպական խորհուրդը վերջնական հավանություն տվեց ԵՄ մաքսային շրջանակի հավակնոտ վերանայմանը, որը տասնամյակների ընթացքում իր տեսակի մեջ ամենաընդգրկուն բարեփոխումն է։
Թարմացված օրենսդրությունը Միությանը տրամադրում է ավելի ժամանակակից գործիքակազմ եւ նորարարական գործիքներ՝ համաշխարհային առեւտուրը խթանելու (մասնավորապես էլեկտրոնային կոմերցիայի ոլորտում) մաքսային տուրքերն ավելի արդյունավետ գանձելու եւ ոչ համապատասխան, վտանգավոր կամ ոչ անվտանգ ապրանքների նկատմամբ վերահսկողությունը խստացնելու համար։
Միության թարմացված մաքսային օրենսգիրքը պարզաբանում է, որ ԵՄ-ից դուրս էլեկտրոնային կոմերցիայի հարթակներն այլեւս համարվում են ապրանքներ ներմուծող՝ ԵՄ-ում վաճառք կատարելիս, եւ, հետեւաբար, իրենք են պատասխանատու բոլոր մաքսային ձեւակերպումների եւ տուրքերի վճարումների կատարման ապահովման համար, այլ ոչ թե ԵՄ վերջնական սպառողը։
Օրենսդրությունը նաեւ նախատեսում է տույժերի ու տուգանքների նոր համակարգ էլեկտրոնային կոմերցիայի այն օպերատորների համար, որոնք չեն կատարում իրենց մաքսային պարտավորությունները, ինչպիսիք են՝ ԵՄ չափանիշների պահպանման եւ համապատասխան մաքսատուրքի վճարման ապահովումը: Չհամապատասխանելու ամենալուրջ դեպքերը կարող են հանգեցնել ընկերության նախորդ տարվա ապրանքների տարեկան ներմուծման արժեքի մինչեւ 6%-ի չափով տուգանքների, որոշակի մաքսային արտոնությունների վերացման եւ նույնիսկ առցանց հարթակներին մուտքի սահմանափակումների:
Կարդացեք նաև
Ի վերջո, էլեկտրոնային կոմերցիայի միջոցով ԵՄ մուտք գործող փոքր ծանրոցների աճող թվի մոնիթորինգի հետ կապված աճող ծախսերը հոգալու համար մինչեւ 2026 թվականի նոյեմբերի 1-ը ԵՄ տարածքում կներդրվի փոքր ծանրոցների մշակման վճար: Հանձնաժողովը կսահմանի վճարի մակարդակը, նախքան այն կսկսի կիրառվել ԵՄ անդամ պետությունների կողմից:
Նոր օրենսդրությամբ ստեղծվում է ամենաթափանցիկ բիզնեսների նոր կատեգորիա՝ վստահելի եւ ստուգված առեւտրային սուբյեկտներ։
Այս սխեմայի շրջանակներում իրենց ապրանքների տեղաշարժի եւ համապատասխանության վերաբերյալ համապարփակ տեղեկատվություն տրամադրող, ինչպես նաեւ այլ խիստ չափանիշներին հետեւող ընկերությունները կօգտվեն պարզեցված մաքսային ընթացակարգերից, ինչը կօգնի խնայել նրանց ժամանակը եւ գումարը։
Ամենահուսալի ընկերությունները կկարողանան իրենց ապրանքները շրջանառության մեջ դնել ԵՄ-ում՝ առանց որեւէ ակտիվ մաքսային միջամտության։
Եվրոպական խորհրդարանը, ինչպես սպասվում է, վերջնական տեքստը կհաստատի սեպտեմբերի վերջին՝ նախքան դրա ստորագրումը եւ ԵՄ պաշտոնական տեղեկագրում հրապարակումը: ԵՄ-ից ներմուծման եւ արտահանման գրանցման համար նոր տվյալների կենտրոնի օգտագործումը պարտադիր կդառնա էլեկտրոնային առեւտրի բիզնեսների համար 2028 թվականի հուլիսի 1-ից, իսկ բոլոր առեւտրային տնտեսվարողների համար՝ 2034 թվականի մարտի 1-ից:
