Հունական լրատվամիջոցները ակտիվորեն անդրադառնում են Աթենքի անվտանգային քաղաքականությանը և Թուրքիայի հետ տարածաշրջանային լարվածությանը՝ փորձելով հանրային քննարկումների առանցքում պահել ռազմական ծախսերի արդարացումը:
Ըստ հունական «Geopolitico» պարբերականի հրապարակված վերլուծության՝ Թուրքիայի հետ հնարավոր հակամարտությունը կարող է դուրս գալ Էգեյան ծովի սահմաններից՝ ընդգրկելով Կիպրոսն ու Արևելյան Միջերկրականը։
Վերլուծաբանների գնահատմամբ՝ նմանօրինակ հռետորաբանությունն ու Իսրայելի հետ ստորագրված 3 մլրդ եվրո արժողությամբ «Աքիլլեսի վահան» պաշտպանական նախագիծն ուղղված են Հունաստանի վարչապետ Կիրիակոս Միցոտակիսի հասցեին հնչող ներքին քննադատությունները չեզոքացնելուն։
Ընդգծվում է, որ հնարավոր հակամարտության պարագայում ՆԱՏՕ-ի աջակցությունը Հունաստանին ավտոմատ բնույթ չի կրի. դաշինքը, ամենայն հավանականությամբ, կսահմանափակվի կողմերին հրադադարի կոչեր անելով միայն:
Կարդացեք նաև
Ռազմական հետազոտությունների ամերիկյան «Global Firepower 2026» ինդեքսի համաձայն՝ Թուրքիան գրեթե բոլոր ցուցանիշներով ռազմական առավելություն ունի Հունաստանի նկատմամբ։
Ցամաքային զորքերում Թուրքիան ունի 2285 տանկ՝ Հունաստանի 1344-ի դիմաց (տարբերությունը՝ 941), և 98․193 զրահամեքենա՝ Հունաստանի 56․416-ի դիմաց (տարբերությունը՝ 41․777)։
Թուրքիայի օդանավերի ընդհանուր քանակը կազմում է 1101, իսկ Հունաստանինը՝ 560 (տարբերությունը՝ 541)։ Թուրքական կողմն ունի 201 կործանիչ, Հունաստանը՝ 178 (տարբերությունը՝ 23), իսկ ուղղաթիռների քանակով Թուրքիան ունի 224-ով գերազանցում է Հունաստանին։
Ռազմածովային ուժերում ևս գերազանցողը Թուրքիան է. թուրքական նավատորմի ընդհանուր կազմում ներառված է 192 միավոր տեխնիկա, իսկ Հունաստանինը՝ 186 (տարբերությունը՝ 6)։ Մասնավորապես թուրքական կողմն ունի 14 սուզանավ՝ հունականի 9-ի դիմաց (տարբերությունը՝ 5), 17 ֆրեգատ՝ Հունաստանի 14-ի դիմաց (տարբերությունը՝ 3) և ականազերծման 11 նավ՝ Հունաստանի 3-ի դիմաց (տարբերությունը՝ 8)։
Հունաստանը Թուրքիային գերազանցում է միայն պարեկային նավերի քանակով՝ 45-ը 40-ի դիմաց (տարբերությունը՝ 5) և քաշովի հրետանային համակարգերի քանակով՝ 698-ը 635-ի դիմաց (տարբերությունը՝ 63)։
Ermenihaber.am
Աղբյուր՝ Haber7
