Այսօր Գյումրու Տիգրան Մեծ փողոցի Զույգաղբյուր կոչվող հատվածում ժամը 18.00-ի սահմաններում դանակահարել են 26-ամյա երիտասարդի ու նրա 57-ամյա հորը։ Ոստիկանության պաշտոնական կայքից տեղեկանում ենք, որ մեքենան կայանելու շուրջ վիճաբանություն է ծագել 67-ամյա հարևանի հետ, որը դանակահարել է որդուն, այնուհետ` հորը։
Գյումրի բժշկական կենտրոնի տնօրենի պաշտոնակատար Արմեն Խաչատրյանը մեզ տեղեկացրեց, որ 26-ամյա երիտասարդին հիվանդանոց են բերել մահացած վիճակում, 57-ամյա տղամարդուն էլ` կրծքավանդակի ձախ կեսի կտրած-ծակած վերքով, շոկային վիճակում։ Նրան միանգամից տարել են վիրահատության, վերակենդանացման բաժանմունքում է։ Ոստիկանության կայքից տեղեկանում ենք, որ համայնքային ոստիկանության Կումայրի բաժնի ծառայողները կարճ ժամանակ անց հայտնաբերել են սպանության մեջ կասկածվող տղանարդուն ու ձերբակալել։
Սպանված երիտասարդը, մեզ հասած տեղեկություններով, գործունեություն էր ծավալում բժշկական ոլորտում, մայրը ևս բժշկական ոլորտից է, բուժքույր է, աշխատում է Գյումրի բժշկական կենտրոնում։
Նունե ԱՐԵՎՇԱՏՅԱՆ
