«21-րդ դար» ժողովրդավարական ազգային կուսակցությունը խորապես մտահոգված է ՆԱՏՕ-ի անդամ երկրների կողմից Հարավսլավիայում տարվող ռազմական գործողությունների կապակցությամբ, որոնք իրականացվում են միջազգային իրավունքի կոպիտ ոտնահարմամբ, հղի են ծանր աշխարհաքաղաքական հետեւանքներով, կարող են ապակայունություն խթանել այլ տարածաշրջաններում։
«21-րդ դար» ժողովրդավարական ազգային կուսակցությունը պաշտպանում է Կոսովոյի բնակչության ինքնորոշման իրավունքը, դատապարտում է Հարավսլավիայի նախագահ Միլոշեւիչի ռեժիմը, որը մեծ պատասխանատվություն է կրում Բալկաններում ստեղծված իրավիճակի համար, եւ, հավատարիմ մնալով հակամարտությունները բացառապես խաղաղ ճանապարհով կարգավորելու միջազգային իրավունքի սկզբունքին, պահանջում է անհապաղ դադարեցնել ռազմական ու զինվորական բոլոր գործողությունները, սկսել բանակցային գործընթաց։
Բալկաններում ՆԱՏՕ-ի կողմից իրականացվող ռազմական գործողությունների հետագա շարունակումը ոչ միայն ամրապնդում է Միլոշեւիչի ռեժիմը Հարավսլավիայում, այլեւ մեծապես վտանգում է ժողովրդավարական գործընթացները զարգացման անցումային փուլում գտնվող երկրներում։ «21-րդ դար» ժողովրդավարական ազգային կուսակցություն
