Գնահատելով «Դինամո» մարզադահլիճում ացկացված բռնցքամարտի Հայաստանի մեծահասակների առաջնությունը՝ հավաքականի գլխավոր մարզիչ Դավիթ Թորոսյանն Aravot.am-ին ասաց, որ այն ցույց տվեց, որ մենք դեռեւս կարող ուժեր ունենք: Սակայն մարզաձեւն ընդհանուր առմամբ այնքան էլ բարվոք վիճակում չէ. «Եղավ այն, ինչ սպասում էինք: Բայց ինչ -որ լավ բան, այնուամենայնիվ, նշմարվում է: Մի քանի քաշային կարգերում, կարծես, ընդգծվում են մեր վաղվա սպասելիքներն իրականացնողները», – ասաց գլխավոր մարզիչը:
Նրա խոսքերով, մրցանակակիրները կընդգրկվեն ազգային հավաքականների թեկնածուների ցուցակ: Հետագայում, հանրապետության երիտասարդական առաջնության ավարտից հետո, մրցափորձի կուտակման նպատակով նրանց հետ համատեղ ուսումնամարզական հավաքների կմասնակցեն նաեւ աչքի ընկած երիտասարդները: Եվ քանի որ այս տարի մեծահասակների Եվրոպայի եւ աշխարհի առաջնություն չկա, մեր տղաները հանդես կգան միջազգային եւ ընկերական մրցաշարերում:
Հարցին, թե հնարավո՞ր է, որ միջազգային մրցափորձ ձեռք բերելու նպատակով մեծահասակներին ժամանակ առ ժամանակ փոխարինեն երիտասարդները, Դավիթ Թորոսյանը պատասխանեց. « Մեր մեծահասակների մեջ էլ քիչ չեն միջազգային մրցափորձի կարիք ունեցողները: Ամեն ինչ հայտնի կլինի միայն հավաքների ու մարզումների ընթացքում»:
Աշոտ ՀԱԿՈԲՅԱՆ
Կարդացեք նաև
