Երեկ Գյումրու քաղաքապետարանում Շիրակի մարզի ոստիկանապետ Վարդան Նադարյանի հետ հանդիպման ժամանակ խոսք ընկավ նաև փողոցային առևտրից: Գյումրու քաղաքապետարանի առևտրի բաժնի աշխատակիցներից մեկը ոստիկանապետից հետաքրքրվեց, թե ե՞րբ են պայքարելու փողոցային առևտրի դեմ ու արժանացավ բավական կոպիտ պատասխանի: Ոստիկանապետը հասկացրեց, որ սոցիալապես անապահով, աշխատատեղերից զուրկ քաղաքում քաղաքապետարանը ոչ թե պետք է մարդու հացը կտրի, այլ օգնի ապրելուն:
«Շատ ցավոտ հարց է, էդ հարցով մենք քաղաքապետի հետ խոսել ենք, մարտավարություն ենք մշակել, բոլորս շատ լավ գիտակցում ենք ժողովրդի սոցիալական վիճակը և պատկերացնում ենք, թե օրական էդ սեղանիկից 5-10 դրամ հայթայթող բազմանդամ ծնողը, որ տանում է տուն, նրա հետևից հանելով, բրթելով, էդ սեղանիկը չտրամադրելով, թե դրա հետևանքները ինչ են դառնալու… Բիրտ, կոպիտ, զուտ օրենքին համապատասխանող քայլերով էսօրվա դրությամբ, երբ որ առավել ևս ահազանգեր, որոշումներ ի կատար ածվում են քաղաքապետարանի կողմից, մեր կողմից ձեռնամուխ լինելը էսպես ինքնաբուխ պրոցեսների շտկման կամ վերացման, դա բավականին լուրջ հետևանքներ են ունենալու: Այսինքն` էսօր գանք մարդուն շատ կոպիտ ձևով ասենք ստեղից դուրս արի, գնա էնտեղ, կամ ոչ մի տեղ մի գնա, էդ 10 դրամից զրկենք, կարող է դուք գաք վաղը մեզ խնդրեք, ասեք` եկեք էսպես լուծենք էս հարցը: Դա շատ վիճահարույց է» , -ասաց ոստիկանապետը:
Ըստ նրա, այլ հարց է, եթե որևէ մեկը սեղանները հանել դրել է այնպես, որ երթևեկությանն է խանգարում, հասարակական կարգին, ոստիկանությունը անմիջապես այդ ամենի լուծումը կտա: «Բայց ընդհանուր երևույթը, որ միասին գնանք սեղանիկը շուռ տանք, տանենք էս կողմ, էն կողմ, դա երևի քաջ գիտակցում եք ինչի կհանգեցնի: Հետևաբար` դա մտածելու, մարտավարություն մշակելու, մարդավարի օրենքով մոտեցումներ դրսևորվելու խնդիրն է»,- ասաց ոստիկանապետը:
Գյումրու քաղաքապետ Սամվել Բալասանյանը շարունակեց այս թեման` բավական արտառոց մի փաստ հրապարակելով: Նա իր խոսքը մասնավորեցրեց` օրինակ բերելով Շահումյան փողոցն ու այսպես ասած Լաչինի միջանցքը, որտեղ ակտիվ փողոցային առևտուր է ծավալվում: «Պիտի ասեմ, որ հենց փողոցի վրա, հենց փողոցի մեջտեղը կա սեփական խանութ, տեսե՞լ եք, ճիշտն ասած վկայականը, որ բերեցին, ես նույնիսկ ապշեցի…Ես հիմա հանել եմ սխեման էդ փողոցի, և ինձ համար զարմանալի է, թե ոնց կարող էր Մայակովսկու փողոցի վրա սեփական խանութ լինել փողոցի ուղիղ կենտրոնում: Իհարկե, ես Երվանդ Զախարյանին տեղեկացրել եմ»,-ասաց Սամվել Բալասանյանը:
Կարդացեք նաև
Ոստիկանապետ Նադարյանը ծիծաղելով արձագանքեց. «Ինչպես որ Գյումրին երկրորդ քաղաքապետարան ունի, այնպես էլ փողոցի մեջտեղում սեփական խանութ կունենա»:
Գյումրու քաղաքապետն ասաց, որ նման սեփականատերերի կողքին կան մարդիկ, որոնք ամբողջ օրը դրսում կանգնած հազիվ հացի փող են վաստակում, և որ Գյումրու քաղաքապետարանը փորձել է կանոնակարգել փողոցային առևտուրը, սակայն դժգոհություններ են հնչել, թե մեր հացն եք կտրում: Հետևաբար` և ըստ քաղաքապետի, անհրաժեշտ է գտնել խոշոր ներդրողի, ով ներդրումներ կկատարի կենտրոնական շուկայում, որպեսզի այս ձևով կարողանան ազատել ամենալայն փողոցը` Շահումյանը: Քաղաքապետը նաև ասաց, որ չեն կարող նույնիսկ գումարներ հավաքել բաց առևտուր անողներից:
Ոստիկանապետը, քաղաքապետի այս խոսքի վրա, շարունակելով թեման, ասաց, որ ոստիկաններին իր օրոք այլևս արգելված է հարկահավաքություն անել շուկայում: Նա խնդրեց նման դեպքերի մասին իրեն անմիջապես տեղյակ պահել և ինքը այդպիսի «անպարկեշտ ու անդաստիարակ» ոստիկաններին կհեռացնի ծառայությունից: Գնդապետ Նադարյանի հայտարարեց, որ այդ հին սովորույթով շարժվող մի քանիսին արդեն իսկ հեռացրել է համակարգից:
Նունե ԱՐԵՎՇԱՏՅԱՆ
Այ մարդ էս բալասանյանը էլ ինչ անի, սաղի վրա գործ սարքեց, անգամ ոստիկանապետին է գործի դնում, որ բռնել տա , էլ էս մարդը Գյումրու համար ինչ անի, որ գյումրեցիները գնահատեն, չեմ հասկանում, իրա ֆունկցիան լավ կատարում է էլի, այ ժողովուրդ, եկեք ծափահարենք, որ հետո հարստահարենք իրան