«Ամերիկայի Միացյալ Նահանգները հիմա շատ բացահայտ Թուրքիային աջակցում է հենց Սիրիայի քաղաքականության մեջ»,- այսօր՝ մարտի 31-ին, լրագրողների հետ հանդիպման ընթացքում, հայտարարեց տարածաշրջանային փորձագետ, հրապարակախոս-վերլուծաբան Սարգիս Հացպանյանը:
Միացյալ Նահանգների՝ Թուրքիայի քննադատությունը փորձագետը ընդամենը դիվանագիտական խաղ է համարում, քանի որ կարծում է, ԱՄՆ-ի ցանկության դեպքում՝ Թուրքիան ոչ մի շարժ չի կարող անել:
«Իրանին ընդհանրապես մեկուսացնելու համար այդտեղ մնացել էր Սիրիան. Եթե Սիրիան ընկավ, Իրանի հարցեր լուծելը ամենահեշտն է լինելու, որովհետեւ ամբողջ կողմերից շրջապատված է Իրանը: Իսկ այն տարածքը, որտեղ նա կարողանում է իր խոսքն ասել Լիբանանն է եւ Սիրիայի իշխանությունները»:
Սարգիս Հացպանյանը նշեց, որ երբեք չի հասկացել վերջին 3-4 տարիների ընթացքում Ռուսաստանի երկկողմանի քաղաքականությունը, քանի որ այն համարում է հակառուսական: Նրա ենթադրությամբ՝ կատարվելիքի մասին ամենից առաջ գիտեր Ռուսաստանը, բայց նա սպասել է զարգացումներին, որից հետո՝ որպես աջակցություն, երեք ռազմանավ է ուղարկել Քեսաբի տարածք, որը եւ դիտվում է որպես Ռուսաստանի կողմից աջակցություն Սիրիային:
Կարդացեք նաև
Պարոն Հացպանյանը հայտարարեց, որ քեսաբյան իրադարձությունների մասին բոլոր ձայնագրություններն ու տեսագրությունները վկայում են այն մասին, որ գործողության մասնակիցները թուրքալեզու են.
«Թուրքիան շատ ուղղակի ներգրավված է Սիրիայի ամբողջ իրադարձությունների մեջ, եւ սա արեւմտյան պետությունները գիտեն ամենից լավ, հատկապես՝ Ամերիկայի Միացյալ Նահանգները, որը այդտեղ Թուրքիայի միջոցով գործողություններ կատարող պետություն է»:
Սարգիս Հացպանյանը զարմանում է Ֆրանսիայի լռության վրա, քանի որ նա որեւէ կերպ ցույց չի տվել իր անհանգստությունը հայկական համայնքի համար, եւ Ֆրանսիայի այդ չեզոքությունը հանցագործություն է համարում:
Փորձագետը նաեւ ոչ ադեկվատ է համարում Հայաստանի արտաքին գործերի նախարարության լռությունը, քանի որ կարծում է՝ բոլոր հանգամանքները կան, որ այդտեղ հայերը դիվանագիտորեն ներկա գտնվեն, նամանավանդ՝ երբ Քեսաբի բնակչության 1/3-ը Հայաստանի Հանրապետության քաղաքացիներ են:
Ամի ՉԻՉԱԿՅԱՆ
