Օրերս Հայոց ցեղասպանության թանգարան-ինստիտուտի տնօրեն Հայկ Դեմոյանը ասուլիսում կոշտ հայտարարություն է արել՝ ասելով, թե ԳԱԱ պատմության ինստիտուտի տնօրեն Աշոտ Մելքոնյանը, համագործակցելով ԲՈՀ-ի հետ, ջանք չի խնայել տապալել իր ատենախոսությունը, եւ ինքն անընդհատ հարվածներ է ստացել Ցեղասպանության 100-ամյա տարելիցին ընդառաջ:
Աշոտ Մելքոնյանի հետ ուրբաթ օրվանից հնարավոր չեղավ կապվել: Աշխատակիցների փոխանցմամբ՝ նա բազմազբաղ էր ու ինչ-որ նիստերի էր մասնակցում, իսկ այս պահին պարոն Մելքոնյանի բջջայինն «անհասանելի» է:
Aravot.am-ի խնդրանքով մեկնաբանելով Հայկ Դեմոյանի ասածը, ԲՈՀ-ի նախագահ Լիլիթ Արզումանյանն ասաց. «Որեւէ համագործակցություն ԲՈՀ-ի եւ Աշոտ Մելքոնյանի միջեւ, որպեսզի տապալվի Հայկ Դեմոյանի ատենախոսության պաշտպանությունը, չի՛ եղել: Պարզապես Հայկ Դեմոյանի ատենախոսության մեջ եղել են որոշ թերություններ, աշխատանքն ուղարկվել է կրկնական քննարկման եւ ուղղվել է: Սա է ամբողջ պատմությունը: Այլ մեկնաբանություն չեմ ուզում տալ, եւ հետո դա իմ օրոք չի եղել»:
Հավելենք, որ Ցեղասպանության թանգարան ինստիտուտի տնօրենը ժամանակին ի վերջո պաշտպանել է ռուսերենով գրված իր դոկտորական ատենախոսությունը եւ մինչ այժմ գիտությունների դոկտորի դիպլոմը չի վերցրել:
Կարդացեք նաև
Գոհար ՀԱԿՈԲՅԱՆ
