«Ինձ նման պատվեր չի եղել»,- Aravot.am-ի հարցին` արդյոք հանրության շրջանում սահմանադրական բարեփոխումների անհրաժեշտության մասին հարցում իրականացրե՞լ են, մայիսի 30-ին մեզ հետ զրույցում տեղեկացրեց սոցիոլոգ Ահարոն Ադիբեկյանը:
Նա նկատեց, թե «սահմանադրական բարեփոխումների գործընթացը չի անցել մտադրությունների գործնական փուլ» ու միևնույն ժամանակ նշեց. «Եթե ուժերը ցանկանում են բարեփոխում անել և առաջարկել արմատական փոփոխություններ, ապա իմաստ ունի նախ հանրության կարծիքն ի հայտ բերել կամ հետազոտությունների, կամ քննարկումների միջոցով»:
Ըստ պարոն Ադիբեկյանի` բնակչության մեծ մասը Սահմանադրության դրույթներին մեծ նշանակություն չի տալիս: Գործնական կիրառությունն իրենց կաշվին ավելի մոտ է, քան թղթի վրա գրված ինչ-որ կետեր:
Մեր դիտարկմանը, թե արդյոք ճիշտ չէ՞ր լինի հանրության շրջանում նախ հարցում կատարեին պարզելու` սահմանադրական բարեփոխումների անհրաժեշտությունը, հետո դրանք իրականացնեին, պարոն Ադիբեկյանն այսպես արձագանքեց. «Ես միշտ ասել եմ բոլոր վարչապետներին և նախագահներին. եթե դուք որոշում եք ընդունում մարդկանց զանգվածային կարիքների վերաբերյալ, նախօրոք պետք է պարզել` հանրությունը ոնց է վերաբերվում դրան: Եթե կուտակայինի վերաբերյալ իմանային, թե հանրությունը ոնց է վերաբերվելու, ինչ կողմ, ինչ դեմ կա, կարելի էր ավելի փափուկ իրականացնել, կամ չդիմել առայժմ, կամ նախապատրաստական, քարոզչական աշխատանքներ տանել: Դժբախտաբար մեզ մոտ կառավարման ավտորիտար ռեժիմ է շարունակում մնալ, կառավարությունը կարծում է, որ եկել է, նրա կարծիքը միանշանակ պիտի ընդունել: Երբեմն բախտը բերում է, օրինակ` Մաքսայինի հարցում, ժողովրդի կարծիքի հետ համընկնում է, երբեմն` ոչ»:
Հարցին` համամի՞տ է այն դիտարկումներին, թե Սերժ Սարգսյանը սահմանադրական բարեփոխումներն իրականացնում է հետագայում վարչապետի պաշտոնում պաշտոնավարելու համար, պարոն Ադիբեկյանը պատասխանեց. «Նա ասաց, որ չի ուզում լինել ոչ նախագահ, ոչ վարչապետ: Նման մակարդակի մարդ սուտ չի խոսի, կամ դատարկ հայտարարություն չի անի, նա իրոք չի ուզում դառնալ: Նա ուզում է ստեղծել մի այնպիսի համակարգ, որ հաջորդը գա, ունենա հեղինակություն, վստահելի լինի, կարողանա արտահայտել ազգային շահերը և իրականացնել: Դրա համար ասում է, եթե գտնում եք, թե Սահմանադրությունը անկատար է, եկեք փոխենք, բայց հավատացած եղեք` չեմ մնա, կմնամ քաղաքականության մեջ, բայց ոչ գործադիրում»:
Կարդացեք նաև
Մեր հարցին` հավատո՞ւմ է Սերժ Սարգսյանի խոսքերին, Ահարոն Ադիբեկյանը պատասխանեց. «Առ այսօր նա երբեք իր խոստումներից հետ չի կանգնել, ուզում եմ վստահ լինել, որ այս դեպքում էլ կկրկնվի նույնը»:
Տաթև ՀԱՐՈՒԹՅՈՒՆՅԱՆ
Աղոթիր, սերժանոս, աղոթիր…Նմաաան մակարդակի համար աղոթելվէ պետք:
Սերժը Ադիբեկին իր բոլոր տված խոստումները կատարել է, էս մարդը իր անձնական գռդոնի մասին է ասում, թե չէ իրականում Սերժի ոչ մի ասած նախընտրական խոստում երբեք չի կատարվել, բոլոր թվերը և խոստացած բարեփոխումները, ներառյալ կոռուպցիայի դեմ պայքարը նույնիսկ այն թուղթը չարժեն որևի վրա գրված են եղել