Իջեւանի տարածաշրջանի ամենամեծ գյուղական համայնքի՝ Աչաջրի կենտրոնում հառնում է 19-րդ դարի վերջին, 20-րդ դարի սկզբին կառուցված Սուրբ Աստվածածին եկեղեցին : Սրբավայրը քանդվելու վտանգի առաջ է կանգնած: Եկեղեցու պատերը խոնավությունից փլվում են, քանդված տանիքից անձրեւներն ու ձյունը ներս են լցվում: Մոտ 6-7 տարի առաջ ուժեղ քամիներից շենքի տանիքը քանդվել է: Եկեղեցի մտնողները պետք է ուշադիր լինեն,քանզի քարերը կարող են թափվել նրանց վրա: Սուրբ Աստվածածինը 4573 բնակիչ ունեցող Աչաջրի միակ եկեղեցին է: Աչաջրի անտառում է հռչակավոր Մակարավանքը, բայց այն գյուղից 7 կիլոմետր հեռավորութամբ է գտնվում, եւ Աչաջրի հավատացյալների համար դժվար է անցնել այդ հեռավորությունը, բարձրանալ անտառի լանջն ի վեր եւ հասնել Մակարավանք:
1930-ական թվականներին կոմունիստները պայթեցել են Սուրբ Աստվածածին եկեղեցու զանգակատունը, որի քարերը ներկայումս որպես նստարան են ծառայում եկեղեցու շրջակա տների բնակիչների համար: Եկեղեցու զանգն էլ տեղափոխել են նախ՝ գյուղի միջնակարգ դպրոց, ապա՝ Հայրենական Մեծ պատերազմում զոհվածների հուշարձան:
Տարիներ առաջ Իջեւանի Սուրբ Ներսես Շնորհալի եկեղեցու հոգեւոր հովիվ Տեր Թորգոմ քահանա Մարգարյանը նախաձեռնել էր եկեղեցու նորոգման համար անհրաժեշտ գումարի հանգանակությունը : Բացվել էր բանկային հաշվեհամար,որին պետք է գումար ուղարկեին տարբեր բնագավառներում ղեկավար դիրք զբաղեցնող,ֆինանսապես կայացած աչաջրեցիները:Սակայն այդ հաշվեհամարին շատ քիչ գումար է հանգանակվել, մինչդեռ Սուրբ Աստվածածին եկեղեցու հիմնանորոգման համար պահանջվում է մի քանի տասնյակ միլիոն դրամ : Աչաջրի գյուղապետ Կամո Ղալթախչյանից տեղեկացանք , որ եկեղեցին գտնվում է հայ առաքելական եկեղեցու հաշվեկշռում:
Ոսկան ՍԱՐԳՍՅԱՆ
