Այն, որ Ռուսաստանում չինովնիկների, հատկապես ուժային ու իրավապահ մարմինների ներկայացուցիչների համար խիստ վերացական հասկացություններ են «մարդու իրավունք» ասվածը եւ մարդ արարածն էլ՝ վերադիր, նորություն չէ: Եվ հայ մեծահարուստ, բարերար, 65-ամյա Լեւոն Հայրապետյանի հանդեպ Ռուսաստանի իրավապահ ու քննչական, դատական մարմինների կողմից դրսեւորվող անմարդկային վերաբերմունքը մի լրացուցիչ անգամ հաստատում է դա:
Իսկ այդ վերաբերմունքը դժվար է բնորոշել այլ կերպ, քան միտումնավոր խոշտանգում: Մարդուն, որը փաստորեն հիվանդ է, ոչ միայն պարզապես պահում են անազատության մեջ, այլեւ այնպիսի պայմաններում, որ առողջ անձնավորությունը մի կերպ կդիմանա, էլ ուր մնաց` հիվանդ, տարիքն առած մեր հայրենակիցը:
Համենայն դեպս նման մտորումների տեղիք են տալիս թե՛ մինչ այս դրսեւորված ընդհանուր վերաբերմունքը, թե՛ երեկ տեղի ունեցածը: Ըստ տարածված տեղեկատվության, «Մատրոսսկայա տիշինա» բանտում կալանավորված Լեւոն Հայրապետյանը երեկ ուշագնաց է եղել: Դժվարությամբ նրան ուշքի են բերել «ավանդական» տարբերակով՝ անուշադրի սպիրտի օգնությամբ:
Հիշեցնենք, որ Ռուսաստանի օրենսդրության համաձայն, սահմանված է որոշակի հիվանդությունների ցանկ, որոնց առկայության դեպքում նախաքննության ժամանակ մեղադրվող անձի նկատմամբ չի կարելի, որպես խափանման միջոց, կիրառել կալանք: Պարզ ասած, չի կարելի կալանավորել: Այսինքն՝ եթե ռուսական իրավապահ մարմիններն առաջնորդվեն Ռուսաստանի գործող օրենքներով, Լեւոն Հայրապետյանը պետք է բանտում չլիներ կամ առնվազն «տնային կալանքի» տակ լիներ:
Մ. ՍԱՀԱԿՅԱՆ
Կարդացեք նաև
Հոդվածն ամբողջությամբ՝ «Հայոց աշխարհ» թերթի այսօրվա համարում
