«Հարավկովկասյան երկաթուղին» օգոստոսի 2-ին եւ 3-ին ներհանրապետական ուղեւորափոխադրումները կատարելու է անվճար
«Հարավկովկասյան երկաթուղին» հայտարարել էր, որ այսօր՝ օգոստոսի 2-ին՝ երկաթուղայինների օրվա կապակցությամբ, ուղեւորափոխադրումները հանրապետության ներսում անվճար են: Սակայն երեկ պարզ էր դարձել, որ երկաթուղայինն այդ օրը փոխել է եւ որոշել է իր ուղեւորներին անվճար սպասարկել կիրակի՝ օգոստոսի 3-ին:
Այս առնչությամբ զրուցեցինք Տրանսպորտի եւ կապի նախարարի տեղակալ Արթուր Առաքելյանի հետ: Նա համարում է, որ կատարվածը թյուրիմացություն է.
«Կարծում եմ՝ մեր գործընկերները առանձին խանդավառությամբ են տոնում այս օրը: Անակնկալը պատրաստված է եղել, որպեսզի մարդիկ կարողանան առավելագույնս ուրախանալ: «Հարավկովկասյան երկաթուղին» մեր ենթակառուցվածքի կոնցեսիոն կառավարիչն է, դա իր որոշումն է, որպեսզի անակնկալ մատուցի հետ մեր հանրությանը»:
Կարդացեք նաև
«Հարավկովկասյան երկաթուղու» մամլո խոսնակ Վահե Դավթյանը նույնպես հայտարարեց, որ թյուրիմացություն է տեղի ունեցել: Նա նշեց, որ տեղի ունեցածը տեղեկատվական բացի արդյունքն է, քանի որ արձակված հրամանը պատշաճ կերպով որոշ աշխատակիցներին չի հասցվել.
«Արդեն շտկվել է այդ իրավիճակը, բայց որպեսզի ամբողջությամբ շտկենք «Հարավկովկասյան երկաթուղու» կողմից որոշում է կայացվել այսօրվա այդ ակցիան կիրառել նաեւ վաղը, այսինքն՝ երկու օր՝ այսօր եւ վաղը ամբողջությամբ Հայաստանի Հանրապետության ներսում ուղեւորափոխադրումները լինելու են անվճար»:
Խոսակցություններ կան, որ երկաթուղին օրը տեղափոխել էր՝ ավելի շատ գումար աշխատելու համար, Վահե Դավթյանը մեզ հայտնեց, որ այդ խոսակցությունները չեն համապատասխանում իրականությանը.
«Եթե ավելի խորը ուսումնասիրեք ուղեւորափոխադրումների տնտեսությունը, ապա կիմանաք, որ ընդհանրապես «Հարավկովկասյան երկաթուղու» ներհանրապետական ուղեւորափոխադրումները ոչ եկամտաբեր են, աշխատում են «մինուսով» եւ սուբսիդավորվում են այդ թվում եւ կառավարության կողմից»:
Ավելի ուշ իմացանք, որ «Հետք» լրատվամիջոցում հրապարակում է տարածվել, որտեղ երեւում է, թե առավոտյան ինչպես է վիճաբանություն առաջացել ուղեւորների եւ «Հարավկովկասյան երկաթուղու» աշխատակիցների միջեւ՝ ուղեւարատոմս չվճարելու պատճառով:
Ամի ՉԻՉԱԿՅԱՆ
