Հատված «Ժառանգություն» կուսակցության փոխնախագահ ԱՐՄԵՆ ՄԱՐՏԻՐՈՍՅԱՆԻ խոսքից:
-Քաղաքական ուժերն ունեն իրենց գործառույթները, եւ այդ գործառույթներից մեկն էլ արտաքին ագրեսիայի դեպքում միասնական գործողություններ ձեռնարկելն է, ինչն էլ արվել է։ Մեկը դա կարող է գնահատել որպես պոպուլիզմ, մյուսը կարող է ավելի կոշտ բառեր օգտագործել, բայց դա չի ազատում քաղաքական ուժերին իրենց պարտականություններից։
Բնական է, որ քաղաքական դաշտը պետք է համախմբվեր արտաքին սպառնալիքի դեմ՝ դա նույնիսկ ենթակա չէ քննարկման, աքսիոմատիկ ճշմարտություն է։ Եթե «Ժառանգությունը» խռովածի կեցվածք ընդուներ եւ ասեր՝ քանի որ 2012-13թթ. ընտրությունները կեղծվել են, բանակը ձերն է, դուք էլ գլուխ հանեք ստեղծված իրավիճակից, սա տրամաբանությունից դուրս մի բան կլիներ, կոպտագույն սխալ ազգային անվտանգության տեսակետից։
Համատեղ հայտարարությունը, այցելությունները դիրքեր, սահմանամերձ շրջաններ նախաձեռնել են ԱԺ խմբակցությունները։ Պաշտոնատար անձինք՝ Հովիկ Աբրահամյանը, ԱԺ նախագահը, միացել են պատգամավորներին, ոչ թե հակառակը, եւ ես դա դրական եմ գնահատում, որովհետեւ ցանկացած պարագայում արտաքին թշնամու դեմ բոլորս միասնական պետք է լինենք, անկախ քաղաքական հայացքներից։
Կարդացեք նաև
Թշնամին չի հարցնելու՝ դիմացը իշխանավո՞ր է, թե՞ ընդդիմադիր, նրա համար բոլորս հայ ենք, եւ այս առումով շատ ողջունելի է, որ ոչ միայն քաղաքական ուժերը՝ ողջ հասարակությունն անմիջապես համախմբվեց բանակի շուրջ։ Շեշտում եմ՝ բանակի, ոչ թե իշխանությունների, ինչպես ոմանք փորձում են ներկայացնել։ Իսկ թե ով ինչ գնահատական կտա՝ թողնում եմ գնահատական տվողների քաղաքական խղճին։
Իհարկե, սա չի նշանակում, թե իշխանափոխության խնդիրը դուրս է եկել կամ կարող է դուրս գալ ընդդիմադիր ուժերի օրակարգից։ Ճիշտ հակառակը՝ օգոստոսյան իրադարձությունները եւս մեկ անգամ ցույց տվեցին, որ ազգային անվտանգության հետ կապված լուրջ խնդիրներ ունենք, որոնց լուծման միակ բանալին իշխանափոխությունն է։
Լիլիթ ՊՈՂՈՍՅԱՆ
Հրապարակումն ամբողջությամբ՝ «Հայոց աշխարհ» թերթի այսօրվա համարում
