«Ֆիլմը գովազդային էր: Կարծում եմ, նախա-նախընտրական գովազդ էր եւ դրա համար ճիշտ էր ընտրված թեման: Խոսում էին մասնագետները, իրենց կարծիքներն էին հայտնում: Նախնական քարոզչության առումով, կարծում եմ, շատ հարմար էր, որովհետեւ ամբողջությամբ նվիրված էր անցյալի դրական հատվածներին»,- «Կենտրոն» հեռուստաընկերության եթերում երեկ ցուցադրված «Քոչարյանական ժամանակներ» տեսաֆիլմի մասին այսպիսի կարծիք հայտնեց ԳԽ նախկին պատգամավոր Ազատ Արշակյանը:
Պարոն Արշակյանն արդեն ենթադրում է, թե ինչի մասին են լինելու Քոչարյանի հաջորդ երկու ֆիլմերը. «Կարծում եմ, հաջորդ ֆիլմում Ռոբերտ Քոչարյանը կտա ներկա իշխանության իր գնահատականը, կամփոփի իր 10-ամյա բացակայության տարիները, թե իր բացակայության ժամանակ ինչ է տեղի ունեցել, իսկ երրորդ ֆիլմով արդեն կներկայացնի ծրագիր՝ ապագայի իր բարեփոխումները»:
Մեր հարցին՝ այսինքն, կարծում եք, սա արդեն լուրջ հայտ է՝ նրա վերադարձի համա՞ր՝ Ազատ Արշակյանը պատասխանեց. «Ռոբերտ Քոչարյանը միշտ լուրջ է եղել: Նա, եթե նույնիսկ կատակ է անում, այդ կատակները ծանրակշիռ են»:
Ըստ Ազատ Արշակյանի, այս ֆիլմը պատահական չէ. «Մարդը ուզում է վերադառնալ քաղաքականություն, պատրաստվում է նախագահական ընտրություններին: Իր իմիջմեյքերները այդ տակտիկան են ընտրել: Ներկայացնում են իր անցյալը, հետո կներկայացնեն այսօրվա վիճակը եւ իր ծրագրերը»:
Կարդացեք նաև
Մենք հետաքրքրվեցինք՝ ընդհանուր առմամբ ֆիլմն ի՞նչ ազդեցություն կթողնի, մարդիկ կմոռանա՞ն Մարտի 1-ը, Հոկտեմբերի 27-ը այդ ֆիլմի ազդեցության տակ՝ Ազատ Արշակյանը պատասխանեց. «Այդ ֆիլմը հասցեատեր ունի: Նրանք, ովքեր պետք է ազդվեն, անպայման կազդվեն: Ռոբերտ Քոչարյանի ընդդիմախոսների համար դա ոչինչ չէր ներկայացնում: Ուրիշ հավակնորդների համար դա ընդամենը մարտահրավեր էր: Տարբեր ընկալումներ են լինելու: Կարծում եմ, այս ֆիլմը ավելի շատ յուրայինների համար էր: Նա այս ֆիլմով ասում էր, որ հայտարարվում է նախնական մոբիլիզացիա: Իսկ ովքեր Հոկտեմբերի 27-ի կամ այլ պատճառներով Ռոբերտ Քոչարյանից նեղացել են, նրա քաղաքականությունից դժգոհ են, նրանք կունենան իրենց կարծիքը: Այս ֆիլմն ուղղված էր յուրայիններին»:
Հռիփսիմե ՋԵԲԵՋՅԱՆ
