Aravot.am-ի հետ զրույցում «Ժառանգության» Գյումրու գրասենյակի պատասխանատու Վահագն Հովհաննիսյանը, գնահատելով Սերժ Սարգսյանի` ՄԱԿ-ի ամբիոնից հնչեցրած ելույթն, ասաց. «Լավ ելույթ է, էլ լավը չլինե՞ր, ամբողջ հանրապետությունով նստել, մի ելույթ էին գրել: Առհասարակ Սերժ Սարգսյանը միշտ էլ լավ է ելույթներ ունենում, միշտ լավ կենացներ ու հայրենասիրական ճառեր է ասում, բայց իրականում… Թող էդ ասած լավ կենացների պես մի քիչ էլ լավ կառավարի…Լիսկա~ է նշանակում… Որպես սյունեցիների հետ շփված անձ` կարող եմ ասել, որ այստեղ իրենց մեղավորությունն ունեն նաև սյունեցիները: Նրանք շատ պասիվ են, բողոքող մասսան քիչ է, նստում են տանը ու սպասում, որ ինչ-որ մեկը ինչ-որ բան պիտի անի իրենց համար: Հազար քաղաքական կուսակցություններ լինեն, նրանք ի՞նչ կարող են անել առանց ժողովրդի ցանկության: Երբ քարոզարշավների ժամանակ Սյունիք էինք գնում, ես զգում էի, որ բացի ղափանցիներից, մյուսները մի տեսակ կաշկանդված, ահաբեկված ու վախեցած են: Ժողովուրդը պատմում էր, որ իրենց մոտ տեռորի, վախի մթնոլորտ է: Դուք գիտեք, որ օրինակ` Գյումրիում այդպես չէ… Այս նշանակմամբ իշխանությունները բացահայտ արհամարհեցին ողջ հայ ժողովրդին և առաջին հերթին սյունեցիներին:
Ես կարծում եմ, որ Լիսկայի պես վարաբեկված մարդուն վերանշանակելու պատճառն այն է, որ կադրեր չունեն, ավելի ճիշտ` հավատարիմ կադրեր: Իրենց կարծիքով էդ տիպի մարդիկ հավատարիմ են իրենց: Բայց եթե հարցին մոտենանք այն տեսանկյունից, որ սա իշխանություն չէ, այլ կլան է, ուրեմն չպիտի զարմանանք այս նշանակումից: Վերջիններս ոչ թե քաղաքագիտական նորմերով են առաջնորդվում, այլ կլանական մոտեցում են ցուցաբերում: Այսինքն, այդ պատասխանատու պաշտոնը անպայման պետք է զբաղեցնի իրենց մաֆիայի անդամը: Բայց մոռանում են, որ ժողովուրդի համբերությունն էլ անսահամանափակ չէ, իրադրությունը լարելով ու հանցագործներին պաշտոնի նշանակելով` ժողովրդին մղում են ծայրահեղ քայլերի: Ի վերջո, ամեն պատմությունն իր ավարտն ունի, ու չարը միշտ պատժվում է»:
Նունե ԱՐԵՎՇԱՏՅԱՆ
