Բուդաղյանների գործով նոյեմբերի 26-ի դատական նիստը սկսվեց տուժող Լորետա Բարսեղյանի ներկայացուցիչներ Ռուբեն Սահակյանի և Մարտին Զիլֆուղարյանի հարցադրումներով: Իսկ ցուցմունք տալիս էր Զարզանդ Նիկողոսյանը: Նրանց կողմից Զարզանդ Նիկողոսյանին տրված հարց ու պատասխանից պարզվեց, որ 2013 թ հունիսի 1-ին Լեռնային Ղարաբաղից եկել էր պատվիրակություն: Նրանք սկզբից եղել են Քաջարանի պղնձամոլիբդենային կոմբինատում, այնուհետև Կապանում և Գորիսում, որից հետո գնացել են Գորիսին մոտիկ գտնվող Սդղին գյոլի պանսիոնատում ճաշկերույթի: Այն ավարտվելուց հետո ամեն մեկը գնացել է իր ճամփով: Ընդ որում, նրանց հետ եղել է Ավետիք Բուդաղյանը: Նա Գորիս վերադառնալուց նստել է Սյունիքի մարզպետ Ս. Խաչատրյանի մեքենան, որի մեջ էին մարզպետը, Զարզանդը: Իսկ վարորդը Արագած Ղևոնդյանն էր: Մեքենայում վեճ է բռնվում և Զարզանդը, որ նստած էր վարորդի կողքին, հետ է դառնում և մի քանի անգամ հարվածում Ավետիք Բուդաղյանին:
Բուդաղյանների փաստաբան Հայկ Ալումյանին հետաքրքրում էր, թե Զարզանդ Նիկողոսյանն ինչ կարգավիճակով էր մասնակցում ճաշկերույթին, որովհետև ինքը տեղեկություն ունի, որ նա մարզպետի թիկնապահն է: Զարզանդ Նիկողոսյանը ասաց, որ իրեն հրավիրել է վարորդ Արագած Ղևոնդյանը, իսկ ով իրեն ասում է, որ մարզպետի թիկնապահն է, նա գլուխը պատովն է տալիս: Հայկ Ալումյանը Զ.Նիկողոսյանին հարցնում է` տեսաձայնագրության ժամանակ լսվում է, որ մեկն ասում է Ավոյի սհենցը-նհենցը, ով է այդ ասում: Չգիտեմ, կարճ ասում է Զ. Նիկողոսյանը: Բուդաղյանների փաստաբանի այն հարցին, թե ինչու Զարզանդ Նիկողոսյանը մի տեղ հոգնակի է խոսում, իսկ մի այլ տեղ եզակի` ասի, դավայ, ելիր ռադդ քաշիր, Զարզանդն ասաց, որ դա խոսելու իր ձևն է: Ռուբեն Սահակյանի այն հարցին, թե` ինչու էր Արտակ Բուդաղյանը զենքով եկել Սուրեն Խաչատրյանի տան մոտ, Զարզանդ Նիկողոսյանը ասաց. «Չգիտեմ, մեքենայի մեջ վեճ է եղել, եկել է իր ձևով հարցը լուծի»:
Հայկ Ալումյանը հակադարձելով ասաց. «Հակաօրինական գործողություններ եք վերագրում Բուդաղյաններին` ձեր վիճակը լավացնելու համար»: Հայկ Ալումյանին հետաքրքրում էին նաև այս հարցերը` քանի կրակոց եղավ դեպքի ժամանակ, Ավետիքը քանի անգամ կրակեց և որ ուղղությամբ, ինչու Զարզանդ Նիկողոսյանը մարզպետի մեքենայից հանեց զենքը, նկատել է, արդյոք, թե ճաշկերույթի ժամանակ ով ինչքան է խմել, Զարզանդ Նիկողոսյանը պատասխանեց բոլոր հարցերին:
Հայկ Ալումյանի խնդրանքով միացրեցին տեսաձայնագրության իրեն անհրաժեշտ հատվածը: Ալումյանն ու Զարզանդը միասին դիտեցին այն, որի ընթացքում փաստաբանը հարցեր էր տալիս վկային: Իր այդ քայլը Հայկ Ալումյանն այսպես բացատրեց.«Ես հակասություններ եմ նկատել Զարզանդ Նիկողոսյանի տված ցուցմունքում, դրա համար էլ պահանջեցի տեսաձայնագրությունը»:
Կարդացեք նաև
Իսկ տուժողի ներկայացուցիչ Ռուբեն Սահակյանը իրենց կողմից Զարզանդ Նիկողոսյանին տրված հարցի նպատակի մասին ասաց.«Իմ պարտականությունն եմ կատարում, ես պատրաստվում եմ իմ ապագա ճառին»:
Հաջորդ նիստը տեղի կունենա դեկտեմբերի 3-ին, Գորիսում:
Ալվարդ ՄԵՍՐՈՊՅԱՆ
