Այս տարի հակառակորդը շփման գծում անընդհատ կրակ է բացում եւ խախտում զինադադարի ռեժիմը: Թե ինչու է հատկապես վերջին շրջանում ակտիվացել հակառակորդը՝ ոմանք դա կապում են Ցեղասպանության 100-ամյակի հետ, ոմանք՝ Գյումրիի դեպքերի:
Ժառանգություն կուսակցության փոխնախագահ Արմեն Մարտիրոսյանն Ադրբեջանի ակտիվացման համար 4 պատճառ է տեսնում. «Պատճառներից գլխավորը ներքաղաքական է, երկրի ներսում իրավիճակը: Երկրորդ պատճառն այն է, որ Ադրբեջանն օգտվում է այն իրավիճակից, որ ցավոք Հայաստանը կոնկրետ այս պահին աշխարհաքաղաքական, միջազգային առումով իրենից հետաքրքրություն չի ներկայացնում՝ իշխանությունների սխալ քաղաքականության արդյունքում: Երրորդ պատճառն այն է, որը շատ հավանական եմ համարում՝ քանի որ նավթի միջազգային գներն ընկել են, իրենք փորձում են շանտաժի լեզուն կիրառել՝ Հայաստանում խուճապ առաջացնել, միջազգային գործընկերների վրա ճնշում բանեցնել, որ արագացնեն եւ իրենց համար նպաստավոր ինչ-որ լուծում առաջարկեն: Ցավոք, վերջերս Ռուսաստանի հետ շատ են ջերմացել եւ դրանից էլ են օգտվում: Չորրորդ հանգամանքը, կարծում եմ, կապ ունի հայ-թուրքական հարաբերությունների հետ՝ Ցեղասպանության 100-րդ տարելիցի հետ կապված»:
Արմեն Մարտիրոսյանը կապ չի տեսնում Գյումրիի դեպքերի եւ շփման գծում լարվածության միջեւ. «Գյումրիի դեպքերը տեղի ունեցան հունվարի 12-ին, բայց մինչ այդ էլ ադրբեջանցիներն արդեն այդ դիվերսիաների քաղաքականությունը սկսել էին մեծ ծավալով»:
Հռիփսիմե ՋԵԲԵՋՅԱՆ
Կարդացեք նաև
